Hover a verse for quick parallels · click it for the full panel across Bibles & notes.
1 ወዝ፡ ካልእ፡ ምሳሌ፡ ዲበ፡ እለ፡ ይክሕዱ፡ ስሞ፡ ለማኅደረ፡ ቅዱሳን፡ ወለእግዚአ፡ መናፍስት።
2 ኢ፡ ሰማየ፡ የዐርጉ፡ ወኢ፡ ምድረ፡ ይበጽሑ፡ ከመ፡ ዝ፡ ይከውን፡ ክፍለ፡ ኃጥኣን፡ እለ፡ ይክሕዱ፡ ስሞ፡ ለእግዚአ፡ መናፍስት፡ እለ፡ ከመ፡ ዝ፡ ይትዐቀቡ፡ ለዕለተ፡ ሥራሕ፡ ወምንዳቤ።
3 ወበይእቲ፡ ዕለት፡ ይነብር፡ በመንበረ፡ ስብሐት፡ ኅሩይ፡ ወየኀሪ፡ ምግባሪሆሙ፡ ወምዕራፎሙ፡ ወኍልቊ፡ አልቦሙ፡ ወመንፈሶሙ፡ በማእከሎሙ፡ ትጸንዕ፡ ሶበ፡ ርእይዎ፡ ለኅሩየ፡ ዚኣየ፡ ወለእለ፡ ይሰክዩ፡ ስምየ፡ ቅዱሰ፡ ወስቡሐ።
4 ወበይእቲ፡ ዕለት፡ ኣነብሮ፡ በማእከሎሙ፡ ወእዌልጣ፡ ለሰማይ፡ ወእገብራ፡ ለበረከት፡ ወብርሃን፡ ዘለዓለም።
5 ወእዌልጣ፡ ለየብስ፡ ወእገብራ፡ ለበረከት፡ ወለኅሩያነ፡ ዚኣየ፡ ኣነብሮሙ፡ ውስቴታ፡ ወእለሰ፡ ይገብሩ፡ ኀጢአተ፡ ወጌጋየ፡ ኢይከይዱ፡ ውስቴታ።
6 እስመ፡ አነ፡ ርኢክዎሙ፡ ወአጽገብክዎሙ፡ በሰላም፡ ለጻድቃንየ፡ ወአንበርክዎሙ፡ ቅድሜየ፡ ወቀርበት፡ ኀቤየ፡ ኵነኔየ፡ ለኃጥኣን፡ ከመ፡ ኣህጕሎሙ፡ እምገጸ፡ ምድር።