1 ራእይ፡ ዘርእየ፡ ኢሳይያስ፡ ወልደ፡ አሞጽ፣፡ ዘርእየ፡ በእንተ፡ ይሁዳ፡ ወበእንተ፡ ኢየሩሳሌም፡ በመንግስተ፡ ዖዝያን፡ ወኢዮአታም፡ ወአካዝ፡ ወሕዝቅያስ፡ እለ፡ ነግሡ፡ ለይሁዳ።
2 ስማዕ፡ ሰማይ፡ ወአጽምዒ፡ ምድር፡ እስመ፡ እግዚአብሔር፡ ነበበ፡ ወይቤ፤ ውሉደ፡ ወለድኩ፡ ወአልሀቁ፤ እሙንቱሰ፡ ዐለዉኒ።
3 ላህምኒ፡ አእመረ፡ ዘአጥረዮ፡ ወአድግኒ፡ ምቅማሖ፡ ወቤተ፡ እግዚኡ፤ እስራኤልሰ፡ ኢያእመሩኒ፡ ወሕዝብየኒ፡ ኢጠየቁኒ።
4 አሌሎ፡ ለሕዝብ፡ ኃጥእ፣፡ ሕዝብ፡ ዘምሉእ፡ ዓመፃ፣፡ ዘርአ፡ እኩያን፣፡ ውሉድ፡ ጽልሕዋን፤ ኀደግምዎ፡ ለእግዚአብሔር፡ ወአምዐዕክምዎ፡ ለቅዱሰ፡ እስራኤል።
5 እፎ፡ እንከ፡ ትቈስሉ፡ እንዘ፡ ትዌስኩ፡ ኃጢአተ፡ በዲበ፡ ኃጢአት፤ ኵሉ፡ ርእስ፡ ለሕማም፡ ወኵሉ፡ ልብ፡ ለኃዘን።
6 እምእግር፡ እስከ፡ ርእስ፡ ዘኢኮነ፡ ቊስለ፡ ወዘኢኮነ፡ ፍቅዓተ፡ ወዘኢኮነ፡ ጸልዐ፡ ዘይመግል፤ ወአልቦ፡ ከመ፡ ይጠይዕዎ፡ ሥራየ፡ ወኢይፀምምዎ፡ ወኢይቀብእዎ።
7 ምድርክሙኒ፡ በድወ፡ ወአህጉሪክሙኒ፡ ውዕያ፡ በእሳት፤ ወለበሐውስቲክሙኒ፡ ፀር፡ ይበልዖ፡ በቅድሜክሙ፣፡ ያማስኖ፡ ወያመዘብሮ፡ ፀር፡ ነኪር።
8 ወትትኀደግ፡ ወለተ፡ ጽዮን፡ ከመ፡ ልገተ፡ ዓቃቤ፡ ቀምሕ፡ ወከመ፡ ዳሰ፡ ዓቃቤ፡ ወይን፡ ወከመ፡ ሀገር፡ ሕጽርት።
9 ወሶበ፡ አኮ፡ እግዚአብሔር፡ ጸባኦት፡ ዘአትረፈ፡ ለነ፡ ዘርአ፡ ከመ፡ ሰዶም፡ እምኮነ፡ ወከመ፡ ገሞራ፡ እመሰልነ።
10 ስምዑ፡ ቃለ፡ እግዚአብሔር፡ መላእክተ፡ ሰዶም፤ ወአጽምዑ፡ ሕገ፡ እግዚአብሔር፡ ሕዝበ፡ ገሞራ።
11 ለምንት፡ ሊተ፡ ብዝኀ፡ መሥዋዕቲክሙ፡ ይቤ፡ እግዚአብሔር፤ ጽጉብ፡ አነ፡ እመሥዋዕተ፡ ሐራጊት፡ ወሥብሐ፡ አባግዕ፤ ኢይፈቅድ፡ ደመ፡ ላህም፡ ወጠሊ።
12 ወእመኒ፡ አምጻእክሙ፡ ኢታስተርእዩኒ፤ መኑ፡ ኀሠሦ፡ ለዝንቱ፡ እምእዴክሙ፤ ወኢትድግሙ፡ እንከ፡ ከይደ፡ ዐፀድየ።
13 እመኒ፡ አምጻእክሙ፡ ስንዳሌ፡ ከንቱ፡ ወዕጣንክሙኒ፡ ርኩስ።
14 ወሠርቀ፡ ወርኅክሙኒ፡ ወበዓላቲክሙኒ፡ ጸልአት፡ ነፍስየ።
15 ወሶበሂ፡ ታነሥኡ፡ እደዊክሙ፡ ኀቤየ፡ እመይጥ፡ አዕይንትየ፡ እምኔክሙ፤ ወእመኒ፡ አብዛኅክሙ፡ ምህልላክሙ፡ ኢይሰምዐክሙ፡ እስመ፡ ደመ፡ ምሉእ፡ እደዊክሙ።
16 ተሐፀቡ፡ ወንጹሓነ፡ ኩኑ፡ ወአእትቱ፡ እከየ፡ ነፍስክሙ፡ እምቅድመ፡ አዕይንትየ፤ ኅድጉ፡ እከየክሙ።
17 ተመሀሩ፡ ገቢረ፡ ሠናይ፤ ኅሥዋ፡ ለጽድቅ፡ ወአድኅኑ፡ ግፉዓ፤ ፍትሑ፡ ለእጓለ፡ ማውታ፡ ወአጽድቁ፡ እቤረ።
18 ወንዑ፡ ንትዋቀሥ፡ ይቤ፡ እግዚአብሔር፤ ወለእመኒ፡ ኮነ፡ ኃጢአትክሙ፡ ከመ፡ ኳኳ፣፡ አጸዐድዎ፡ ከመ፡ በረድ፤ ወለእመኒ፡ ኮነ፡ ከመ፡ ለይ፣፡ አነጽሖ፡ ከመ፡ ፀምር።
19 ወእመሰ፡ ፈቀድክሙ፡ ወሰማዕክሙኒ፣፡ በረከተ፡ ምድር፡ ትበልዑ።
20 ወእመሰ፡ አበይክሙ፡ ሰሚዖትየ፣፡ ወጥባሕት፡ ትበልዐክሙ፤ እስመ፡ ከማሁ፡ ነበበ፡ አፉሁ፡ ለእግዚአብሔር።
21 እፎ፡ ኮነት፡ ዘማ፡ ሀገረ፡ ጽዮን፡ ማእምንት፡ እንተ፡ ምልእት፡ ፍትሐ፤ ወኀደረ፡ ውስቴታ፡ ጽድቅ፣፡ ይእዜሰ፡ ፈያት፡ ወቀተልት።
22 ወርቅክሙኒ፡ ተምያን፡ ወመያስያኒክሙኒ፡ ይቶስሑ፡ ማየ፡ ውስተ፡ ወይን።
23 መላእክቲክሙኒ፡ ከሐድያን፣፡ ሱቱፋነ፡ ሰረቀት፣፡ መስተናድኣን፡ ወያፈቅሩ፡ ሕልያነ፤ ወይፈቅዱ፡ ይሚጡ፡ ፍትሐ፡ ወኢያጸምዑ፡ እቤረ፡ ብእሲተ፡ ወኢይፈትሑ፡ ለእጓለ፡ ማውታ።
24 በበይነ፡ ዝንቱ፡ ከመዝ፡ ይቤ፡ እግዚአብሔር፡ ጸባኦት፤ አሌ፡ ሎሙ፡ ለኃያላነ፡ እስራኤል፤ ኢይቈርር፡ መዓትየ፡ እምላዕለ፡ ፀርየ፡ ወእትቤቀሎሙ፡ ለጸላእትየ።
25 ወአመጽእ፡ እዴየ፡ ላዕሌኪ፡ ወአረስነኪ፤ ወአውዕዮሙ፡ ለከሐድያን፡ ወአአትቶሙ፡ እምኔኪ፡ ለኵሎሙ፡ ዓማፅያን።
26 ወእሠይም፡ ለኪ፡ መኳንንተኪ፡ ከመ፡ ትካት፡ ወመማክርተኪ፡ ከመ፡ ቀዲሙ።
27 እስመ፡ በጽድቅ፡ ይድኅኑ፡ ፄዋኪ፡ ወበምጽዋት።
28 ወይትቀጥቀጡ፡ ኃጥኣን፡ ወዓማፅያን፡ ኅቡረ፤ ወይጠፍኡ፡ ኵሎሙ፡ እለ፡ ኀደግዎ፡ ለእግዚአብሔር።
29 ወይትኀፈሩ፡ በአማልክቲሆሙ፡ በዘመከሩ፡ ለሊሆሙ፡ ወይትኀፈሩ፡ በምሕራማቲሆሙ፡ ዘፈተዉ።
30 ወይከውኑ፡ ከመ፡ ዕፀ፡ ጠርቤንቶስ፡ እንተ፡ ነገፈት፡ ቈጽላ፡ ወከመ፡ ገነት፡ እንተ፡ አልባቲ፡ ማየ።
31 ወይከውን፡ ኃይሎሙ፡ ከመ፡ ብርዓ፡ ባሕሩስ፡ ወምግባራቲሆሙኒ፡ ከመ፡ አፍሀመ፡ እሳት፤ ወይውዕዩ፡ ኃጥኣን፡ ወዓማፅያን፡ ኅቡረ፡ ወየኀጥኡ፡ ዘያጠፍእ፡ ሎሙ፡ እሳቶሙ።