1 ወበሠላሳ ፡ ወኃምስቱ ፡ ኢዮቤልዉ ፡ በሱባዔ ፡ ሣልስ ፡ በአሐዱ ፡ ዓመቱ ፡ ሎቱ ፡ ነሥአ ፡ ሎቱ ፡ ራግው ፡ ብእሲተ ፡ ወስማ ፡ አራ ፡ ወለተ ፡ ኡር ፡ ወልደ ፡ ኬሴድ ፡ ወወለደት ፡ ሎቱ ፡ ወልደ ፡ ወጸውዐ ፡ ስሞ ፡ ሴሩግ ፡ በሳብዕ ፡ ሱባዔሁ ፡ ለዝ ፡ ሱባዔ ።
2 ወበዝ ፡ ኢዮቤልዉ ፡ ወጠኑ ፡ ውሉደ ፡ ኖኅ ፡ ይትቃተሉ ፡ ለፄውዎ ፡ ወለቀቲል ፡ አሐዱ ፡ አሐዱ ፡ እኅዋሁ ፡ ወለክዒወ ፡ ደመ ፡ ሰብእ ፡ ዲበ ፡ ምድር ፡ ወለበሊዐ ፡ ደም ፡ ወለሐኒጸ ፡ አህጉር ፡ ጽኑዓት ፡ ወጥቅም ፡ ወማኅፈድ ፡ ወለተልዕሎ ፡ ብእሲ ፡ ላዕለ ፡ ሕዝብ ፡ ወለሰዪመ ፡ መቅድመ ፡ መንግሥት ።
3 ወሐነጸ ፡ ኡድ ፡ ወልደ ፡ ኬሴድ ፡ ሀገረ ፡ አራሃ ፡ እንተ ፡ ከልዴዎን ፡ ወሰመየ ፡ ስማ ፡ በስመ ፡ ዚአሁ ፡ ወበስመ ፡ አቡሁ ፡ 4 ወገብሩ ፡ ሎሙ ፡ ስብከዋተ ፡ ወይሰግድ ፡ አሐዱ ፡ ለጣዖት ፡ ዘገብረ ፡ ለርእሱ ፡ ስብኮ ።
5 ወመኰንን ፡ ወስቴማ ፡ ይኄይል ፡ ለግብረ ፡ ዝንቱ ፡ ኵሉ ፡ ወይፌኑ ፡ በእደ ፡ መናፍስት ፡ ለእለ ፡ ተውህቡ ፡ ታሕተ ፡ እዴሁ ፡ ለገቢረ ፡ ኵሉ ፡ ጌጋይ ፡ ወኃጢአት ፡ ወኵሉ ፡ አበሳ ፡ ለአማስኖ ፡ ወለአሕጕሎ ፡ ወለክዒወ ፡ ደም ፡ ዲበ ፡ ምድር ።
6 በእንተዝ ፡ ተጸውዐ ፡ ስሙ ፡ ለሴሩክ ፡ ሴሩክ ፡ እስመ ፡ ተመይጠ ፡ ኵሉ ፡ ለገቢረ ፡ ኵሉ ፡ ኃጢአት ።
7 ወልህቀ ፡ ወኀደረ ፡ ውስተ ፡ ኡር ፡ ዘከላዴዎን ፡ ቅሩበ ፡ አበ ፡ እመ ፡ ብእሲቱ ፡ ወኮነ ፡ ያመልክ ፡ ጣዖተ ።
8 ወወለደት ፡ ሎቱ ፡ ናኮርሃ ፡ በዓመት ፡ ቀዳሚሁ ፡ ለዝ ፡ ሱባዔ ፡ ወልህቀ ፡ ወኀደረ ፡ ውስተ ፡ ኡር ፡ ውስተ ፡ ዘእለ ፡ ኡር ፡ ከለዳዊያን ፡ ወመሀሮ ፡ አቡሁ ፡ ኁሣሤሆሙ ፡ ለከለዳዊያን ፡ ለተማርዮ ፡ ወለተሰግሎ ፡ በተአምረ ፡ ሰማይ ።
9 ወበሠላሳ ፡ ወሰብዓቱ ፡ ኢዮቤልዉ ፡ በሱባዔ ፡ ሳድስ ፡ በአሐዱ ፡ ዓመቱ ፡ ሎቱ ፡ ነሥአ ፡ ብእሲተ ፡ ወስማ ፡ ኢያስካ ፡ ወለተ ፡ ኔስታግ ፡ ዘከለዳዊያን ፡ 10 ወወለደት ፡ ሎቱ ፡ ታራሃ ፡ በዓመት ፡ ሳብዕ ፡ ለዝ ፡ ሱባዔ ።
11 ወፈነወ ፡ መኰንን ፡ መስቴማ ፡ ቋዓተ ፡ ወአዕዋፈ ፡ ከመ ፡ ይብልዑ ፡ ዘርአ ፡ ዘይዘራእ ፡ ውስተ ፡ ምድር ፡ ወለአማስኖ ፡ ምድር ።
12 በእንተዝ ፡ ጽውዐ ፡ ስሞ ፡ ታራ ።
13 ወአኀዙ ፡ ዓመታት ፡ ይዕበሩ ፡ እምቅድመ ፡ ገጾሙ ፡ ለአዕዋፍ ፡ ወኵሎ ፡ ፍሬ ፡ ዕፅ ፡ ይበልዑ ፡ እምአእዋም ፡ በኃይል ፡ ዐቢይ ፡ እመ ፡ ክህሉ ፡ አድኅኖ ፡ ኅዳጠ ፡ እምኵሉ ፡ ፍሬ ፡ ምድር ፡ በመዋዕሊሆሙ ።
14 ወበዝ ፡ ሠላሳ ፡ ወተስዓቱ ፡ ኢዮቤልዉ ፡ በሱባዔ ፡ ካልእ ፡ በቀዳሚ ፡ ዓመት ።
15 ወበዓመት ፡ ሳብዕ ፡ ለዝ ፡ ሱባዔ ፡ ወለደት ፡ ሎቱ ፡ ወልደ ።
16 ወአኀዘ ፡ ሕፃን ፡ ያእምር ፡ ስሕተተ ፡ ምድር ፡ ከመ ፡ ኵሉ ፡ ይስሕት ፡ በድኅሬሆሙ ፡ ለግልፎ ፡ ወድኅረ ፡ ርኵስ ።
17 ወአኀዝ ፡ ይጸሊ ፡ ኀበ ፡ ፈጣሬ ፡ ኵሉ ፡ ከመ ፡ ያድኅኖ ፡ እምስሕተተ ፡ ውሉደ ፡ ሰብእ ።
18 ወበጽሐ ፡ ጊዜ ፡ ዘርእ ፡ ለዘሪእ ፡ ውስተ ፡ ምድር ።
19 ወደመና ፡ ቋዓት ፡ መጽኡ ፡ ከመ ፡ ይብልዑ ፡ ዘርአ ፡ ወአብራም ፡ ይረውጽ ፡ አንፃሪሆሙ ፡ ዘእንበለ ፡ ይንበሩ ፡ ውስተ ፡ ምድር ፡ ወይኬልሕ ፡ ላዕሌሆሙ ፡ ዘእንበለ ፡ ይንበሩ ፡ ዲበ ፡ ምድር ፡ ለበሊዐ ፡ ዘርእ ፡ ወይብል ፡ ኢትረዱ ፡ ግብኡ ፡ ውስተ ፡ መካን ፡ ኀበ ፡ ወፃእክሙ ፡ ወተመይጡ ፡ 20 ወገብረ ፡ በይእቲ ፡ ዕለት ፡ ለደመና ፡ ቋዓት ፡ ሰብዓ ፡ ወኢነበረ ፡ እምኵሉ ፡ ቋዓት ፡ ውስተ ፡ ኵሉ ፡ ገራውህ ፡ ኀበ ፡ ሀሎ ፡ አብራም ፡ ህየ ፡ ወኢአሐዱ ።
21 ወይሬእይዎ ፡ ኵሎሙ ፡ እለ ፡ ምስሌሁ ፡ ውስተ ፡ ኵሉ ፡ ገራውህ ፡ እንዘ ፡ ይኬልሕ ፡ ወኵሉ ፡ ቋዓት ፡ ተመይጡ ።
22 ወመጽኡ ፡ ኀቤሁ ፡ በዓመት ፡ ዝንቱ ፡ ኵሎሙ ፡ እለ ፡ ይዘርኡ ፡ ወሀሎ ፡ የሐውር ፡ ምስሌሆሙ ፡ እስከ ፡ አመ ፡ የሐልቅ ፡ ጊዜ ፡ ዘርእ ፡ ወዘርኡ ፡ ምድሮሙ ።
23 ወበዓመት ፡ አሐዱ ፡ ዘሱባዔ ፡ ኃምስ ፡ መሀረ ፡ አብራም ፡ ለእለ ፡ ይገብሩ ፡ ንዋየ ፡ አልህምት ፡ ለኬነተ ፡ ዕፅ ፡ ወገብሩ ፡ ንዋየ ፡ በመልዕልተ ፡ ምድር ፡ በአንጻረ ፡ ድጕር ፡ ዕርፍ ፡ ከመ ፡ ያንብር ፡ ላዕሌሁ ፡ ዘርአ ፡ ወይወርድ ፡ እምውስቴቱ ፡ ዘርእ ፡ ውስተ ፡ ከተማ ፡ ዕርፍ ፡ ወይትኀባእ ፡ ውስተ ፡ ምድር ፡ ወኢይፈርሁ ፡ እንከ ፡ እምገጸ ፡ ቋዓት ፡ 24 ወገብሩ ፡ ከመዝ ፡ ላዕለ ፡ ኵሉ ፡ ድጕረ ፡ ዕርፍ ፡ መልዕልተ ፡ ምድር ፡ ወዘርኡ ፡ ወገብሩ ፡ ኵሉ ፡ ምድር ፡ ዘከመ ፡ አዘዞሙ ፡ አብራም ፡ ወኢይፈርሁ ፡ እንከ ፡ እምአዕዋፍ ።