Hover a verse for quick parallels · click it for the full panel across Bibles & notes.
1 ፵፯ ፡ በእንተ ፡ መሥዋዕተ ፡ አዛርያስ ፡ ወንጉሥ ። ወሖረ ፡ ኢዮአስ ፡ ወልደ ፡ ዮዳሔ ፡ ወነገሮ ፡ ለንጉሥ ፡ ሰሎሞን ፡ ወተፈሥሐ ፡ ንጉሥ ፡ በእንተዝ ፡ ወአዘዘ ፡ ከመ ፡ ያስተዳልዉ ፡ መሣውዐ ፡ መሥዋዕተ ፡ ከመ ፡ ይሡዕ ፡ ወልዱ ፤ ወአምጽአ ፡ ወወሀቦ ፡ ዘይበፅዕ ፡ ለእግዚኣብሔር ፡ ፻ ፡ አስዋረ ፡ ወ፻ ፡ መግዝአ ፡ ላህም ፡ ወ፼ ፡ አባግዕ ፡ ወ፼ ፡ አጣሊ ፡ ወእምነ ፡ ዘይትበላዕ ፡ አራዊት ፡ በበ፲ ፡ ወእምነ ፡ አዕዋፍ ፡ ዘንጹሕ ፡ በበ ፡ ፲ ፡ በዘያወጽሕ ፡ ወይሠውዕ ፡ ለአምላከ ፡ እስራኤል ፤ ወመሥዋዕተ ፡ ስንዳሌኒ ፡ ፳ ፡ ጻሕለ ፡ ዘብሩር ፡ ለለ ፡ አሐቲ ፡ ዘበበ ፡ ፲ወ፪ ፡ ድልወተ ፡ ሰቅሎን ፡ ወ፵ ፡ መዛርአ ፡ ኀባውዝ ፤ ወዘንተ ፡ ኵሎ ፡ ወሀቦ ፡ ለዳዊት ፡ ወልዱ ፡ ሰሎሞን ፡ ንጉሥ ። ወካዕበ ፡ ለአከ ፡ እንዘ ፡ ይብል ፡ ይሡዕአ ፡ ሊተ ፡ አዛርያስ ፡ ወልደ ፡ ካህን ፡ ህየንቴየ ፤ ወይቤሎ ፡ ግበርአ ፡ ዘፈቀድከ ። ወተፈሥሐ ፡ አዛርያስ ፡ በእንተዝ ፡ ነገር ፡ ወሖረ ፡ ወአምጽአ ፡ እመራዕየ ፡ አቡሁ ፡ አሐተ ፡ ላህመ ፡ እንተ ፡ ኢሰሐበት ፡ አርዑተ ፡ ወ፬ ፡ ጠሊተ ፡ ዘዘ ፡ ዓመት ፡ ወ፬ ፡ በግዐ ፡ ንጹሓን ፡ ዘዘ ፡ ዓመት ። ወሖረ ፡ ንጉሥ ፡ ከመ ፡ ይሡዕ ፡ ወተደለዉ ፡ ካህናት ፡ ወተጋብኡ ፡ ነዳያን ፡ ወተፈሥሐ ፡ አዕዋፈ ፡ ሰማይ ፡ ወኀብሩ ፡ ፍሥሓ ፡ ዐቢየ ፡ በይእቲ ፡ ዕለት ። ወአዛርያስኒ ፡ ደመረ ፡ ምስለ ፡ መሥዋዕተ ፡ ንጉሥ ፡ ወሦዐ ፡ ንዋዮ ፡ በከመ ፡ አዘዞ ፡ መልአከ ፡ እግዚኣብሔር ፡ ለአዛርያስ ፡ በሌሊት ። ወእምዝ ፡ እምድኅረ ፡ ሦዑ ፡ ገብኡ ፡ ውስተ ፡ አብያቲሆሙ ፡ ወኖሙ ፨ ፨