Hover a verse for quick parallels · click it for the full panel across Bibles & notes.
1 ፹፫ ፡ በእንተ ፡ ንጉሠ ፡ እስማኤላውያን ። ወበእንተዝ ፡ ኮኑ ፡ ነገሥተ ፡ ደቂቀ ፡ ይስማዔል ፡ ላዕለ ፡ ትርብ ፡ ወላዕለ ፡ ቅብጥ ፡ ወላዕለ ፡ ኖባ ፡ ወሶበ ፡ ወኵርጒ ፡ ወሪፊ ፡ ወማካ ፡ ወሞርና ፡ ወፊንቃና ፡ ወኣርሲባና ፡ ወሊባ ፡ ወመስዕ ፤ እስመ ፡ ዘርአ ፡ ሴም ፡ ውእቱ ። ወዘርአ ፡ ይስሓቅኒ ፡ ነግሠ ፡ ላዕለ ፡ ይሁዳ ፡ ወላዕለ ፡ አሞሬዎን ፡ ወላዕለ ፡ ኬጤዎን ፡ ወኢያቡሴዎን ፡ ወፌርዜዎን ፡ ወኤዌዎን ፡ ወኬልቄዴዎን ፡ ወሮምያ ፡ ወአንጾክያ ፡ ወሶርያ ፡ ወአርማንያ ፡ ወፍልስጥኤም ፡ ወኢትዮጵያ ፡ ወኤዶም ፡ ወኢሎፍሊ ፡ ወኢዮኣብ ፡ ወዓማሌቅ ፡ ወአፍራግያ ፡ ወባቢሎን ፡ ወዮናንስጥ ፡ ወዕብራይስጥ ። እስመ ፡ ኵላ ፡ መንግሥት ፡ በከመ ፡ መሐለ ፡ እግዚኣብሔር ፡ ወሀቦሙ ፡ ለዘርአ ፡ ሴም ፤ ልዑል ፡ መንበር ፡ ወምኵናን ፡ ለዘርአ ፡ ሴም ፡ በከመ ፡ ባረኮ ፡ አቡሁ ፡ ኖኅ ፡ በቃለ ፡ እግዚኣብሔር ፡ ለሤም ፡ ወልዲ ፡ እንዘ ፡ ይብል ፡ ኵን ፡ እግዚአ ፡ ለአኀዊከ ፡ ወንግሥ ፡ ላዕሌሆሙ ፤ ወዘንተ ፡ ዘይቤ ፡ በእንተ ፡ መድኅን ፡ ዘለኵልነ ፡ ንጉሥ ፡ ኢየሱስ ፡ ክርስቶስ ፡ ንጉሠ ፡ ሰማያት ፡ ወምድር ፡ ዘውእቱ ፡ ያዐቢ ፡ ነገሥተ ፡ ወለእለ ፡ ፈቀደ ፡ ካዕበ ፡ ይስዕር ፡ ስልጣኖሙ ፤ እስመ ፡ ሎቱ ፡ ክሂል ፡ ወስልጣን ፡ ላዕለ ፡ ኵሉ ፡ ፍጥረት ፡ ለዓለመ ፡ ዓለም ፡ አሜን ፨ ፨ ፨