1 አመ፡ ፲ወ፯ዓመተ፡ መንግሥቱ፡ ለፋቁሔ፡ ወልደ፡ ሮሜልዩ፡ ነግሠ፡ አካዝ፡ ወልደ፡ ዮአታም፡ ንጉሠ፡ ይሁዳ።
2 ወ፳ክረምቱ፡ አመ፡ ይነግሥ፡ አካዝ፡ ወ፲ወ፮ክረምተ፡ ነግሠ፡ በኢየሩሳሌም፡ ወኢገብረ፡ ሠናየ፡ ቅድመ፡ አዕይንቲሁ፡ ለእግዚአብሔር፡ አምላኩ፡ ወኢኮነ፡ ምእመነ፡ ከመ፡ ዳዊት፡ አቡሁ።
3 ወሖረ፡ በፍኖተ፡ ኢዮርብዓም፡ ወልደ፡ ናባጥ፡ ንጉሠ፡ እስራኤል፡ ወወልዶ፡ ሦዐ፡ በእሳት፡ ለርኵሶሙ፡ ለአሕዛብ፡ እለ፡ አሰሰለ፡ እግዚአብሔር፡ እምቅድመ፡ ገጾሙ፡ ለእስራኤል።
4 ወሦዐ፡ ወዐጠነ፡ ሎሙ፡ ውስተ፡ አብያተ፡ አማልክት፡ ወውስተ፡ አውግር፡ ወታሕተ፡ ኵሉ፡ ዖም፡ ጽፉቅ።
5 ወይእተ፡ አሚረ፡ ዐርጉ፡ ረአሶን፡ ንጉሠ፡ [ሶርያ፡] ወፋቁሔኒ፡ ወልደ፡ ሮሜልዩ፡ ንጉሠ፡ እስራኤል፡ ላዕለ፡ ኢየሩሳሌም፡ ከመ፡ ይትቃተልዎሙ፡ ወተቃተልዎ፡ ለአካዝ፡ ወስእኑ፡ መዊኦቶ።
6 ወይእተ፡ ዕለተ፡ አግብአ፡ ሎሙ፡ ረአሶን፡ ንጉሠ፡ [ሶርያ፡] ኤላተ፡ ለሶርያ፡ ወአውፅኦሙ፡ በአይሁድ፡ እምኤላት፡ ወሰብአ፡ ኤዶምያስ፡ ገብኡ፡ ውስተ፡ ኤላት፡ ወነበፋ፡ ህየ፡ እስከ፡ ዮም።
7 ወለአከ፡ አካዝ፡ ሐዋርያተ፡ ኀበ፡ ተልጌልፌልሶር፡ ንጉሠ፡ ፋርስ፡ እንዘ፡ ይብል፡ ገብርከኒአ፡ ወወልድከኒአ፡ አነአ ፤ ዕረግአ፡ ወአድኅነኒአ፡ እምነ፡ እዴሁ፡ ለንጉሠ፡ ሶርያ፡ ወእምእዴሁ፡ ለንጉሠ፡ እስራኤልአ፡ እለ፡ ተንሥኡ፡ ሳዕሌየአ።
8 ወነሥአ፡ አካዝ፡ ወርቀ፡ ወብሩረ፡ ዘተረክበ፡ ውስተ፡ መዛግብተ፡ ቤተ፡ እግዚአብሔር፡ ወዘቤተ፡ ንጉሥ፡ ወፈነወ፡ ሎቱ፡ ለንጉሥ፡ አምኃሁ።
9 ወአሆ፡ ይቤሎ፡ ንጉሠ፡ ፋርስ፡ ወዐርገ፡ ንጉሠ፡ ፋርስ፡ ውስተ፡ ደማስቆ፡ ወነሥኦሙ፡ ወአፍለሶሙ፡ ወቀተሎ፡ ለረአሶን ።
10 ወሖረ፡ አካዝ፡ ንጉሥ፡ ወተቀበሎ፡ ለቴልገፌልሶር፡ ንጉሠ፡ ፋርስ፡ ውስተ፡ ደማስቆ፡ ወርእየ፡ በህየ፡ መሥዋዕተ፡ በደማስቆ፡ ወፈነወ፡ አካዝ፡ ንጉሥ፡ ኀበ፡ አርያ፡ ካህን፡ አርአያሁ፡ ለውእቱ፡ መሥዋዕት፡ ወሥርዐተ፡ ኵሉ፡ ግብረቱ።
11 ወሐነጸ፡ አርያ፡ ካህን፡ ምሥዋዐ፡ ኵሎ፡ ዘከመ፡ ፈነወ፡ ሎቱ፡ ንጉሥ፡ አካዝ፡ እምደማስቆ።
12 ወርእዮ፡ ንጉሥ፡ ለውእቱ፡ ምሥዋዕ፡ ወዐርገ፡ ውስቴቱ።
13 ወዐጠነ፡ ወሦዐ፡ ወአውጽሐ፡ ወከዐወ፡ ደመ፡ መሥዋዕተ፡ ሰላም፡ ውስተ፡ ምሥዋዕ።
14 ምሥዋዕኒ፡ ዘብርት፡ ዘቅድመ፡ እግዚአብሔር፡ አሰሰለ፡ እምቅድመ፡ ቤተ፡ እግዚአብሔር፡ እማእከለ፡ ምሥዋዕ፡ ወአንበሮ፡ መንገለ፡ ደቡቡ፡ ለምሥዋዕ።
15 ወአዘዞ፡ አካዝ፡ ንጉሥ፡ ለእርያ፡ ካህን፡ ወይቤሎ፡ ውስተ፡ ምሥዋዕ፡ ዘየዐቢ፡ ሡዕ፡ መሥዋዕተ፡ ነግህ፡ ወመሥዋዕተ፡ ሰርክ፡ ወመባአ፡ ንጉሥሰ፡ ወመሥዋዕቶ፡ ወመሥዋዕተ፡ ኵሉ፡ ሕዝብ፡ ወመባኦሙ፡ ወሞጻሕቶሙ፡ ወኵሎ፡ ደመ፡ መሥዋዕት፡ ወኵሎ፡ ደመ፡ መባኦሙ፡ ትክዑ፡ ዲቤሁ፡ ወምሥዋዕሰ፡ ዘብርት፡ ይኩነነ፡ ለነግሀ፡ ነግህ።
16 ወገብረ፡ አርያ፡ ካህን፡ ኵሎ፡ ዘከመ፡ አዘዞ፡ አካዝ፡ ንጉሥ።
17 ወዐጸወ፡ ንጉሥ፡ ኵሎ፡ መብዐለ፡ ሜክኖት፡ ወአሰሰለ፡ እምኔሆሙ፡ ማዕከከ፡ ወባሕረኒ፡ ነሠተ፡ ወአውረዶ፡ እምላዕለ፡ አልህምተ፡ ብርት፡ እለ፡ መትሕታ፡ ወገብረ፡ ዘእብን፡ ምንባራ።
18 መሰረተ፡ ምንባራኒ፡ ሐነጸ፡ ውስተ፡ ቤተ፡ እግዚአብሔር፡ ወሙባኡ፡ ለንጉሥ፡ ወዘአፍአኒ፡ አግብአ፡ ውስተ፡ ቤተ፡ እግዚአብሔር፡ እምቅድመ፡ ገጹ፡ ለንጉሠ፡ ፋርስ።
19 ወኵሉ፡ ነገሩ፡ ለአካዝ፡ ወኵሉ፡ ዘገብረ፡ ናሁ፡ ዝውእቱ፡ ዘጽሑፍ፡ ውስተ፡ መጽሐፈ፡ ነቢያቲሆሙ፡ ለነገሥተ፡ ይሁዳ ።
20 ወሰከበ፡ አካዝ፡ ምስለ፡ አበዊሁ፡ ወቀበርዎ፡ ውስተ፡ ሀገረ፡ ዳዊት፡ ወነግሠ፡ ሕዝቅያስ፡ ወልዱ፡ ህየንቴሁ።