1 ወአሐቲ፡ ብእሲት፡ እምውስተ፡ እዋልደ፡ ነቢያት፡ ጸርኀት፡ ኀበ፡ ኤልሳዕ፡ ወትቤ፡ ገብርከ፡ ፈራሄ፡ እግዚአብሔር፡ ምትየ፡ ውእቱ፡ ወሞተ፡ ወመጽአ፡ በዓለ፡ ዕዳ፡ ይንሥኦሙ፡ ለ፪ደቂቅየ፡ ይቅንዮሙ።
2 ወይቤላ፡ ኤልሳዕ፡ ምንተ፡ ትፈቅዲ፡ እግበር፡ ለኪ፡ ንግርኒ፡ ወምንት፡ ብኪ፡ በውስተ፡ ቤትኪ ፤ ወትቤሎ፡ አልባቲ፡ ለአመትከ፡ ውስተ፡ ቤታ፡ ወኢምንተኒ፡ ዘእንበለ፡ ልኵንተ፡ ቅብእ፡ ዘእትቀባእ።
3 ወይቤላ፡ ሖሪ፡ ተዋሐሲ፡ ለኪ፡ ንዋየ፡ ልሕኵት፡ እምኀበ፡ ጎርኪ።
4 ወባኢ፡ ቤተኪ፡ ወዕጸዊ፡ ኆኅተኪ፡ ላዕሌኪ፡ ወላዕለ፡ ደቂቅኪ፡ ወሱጢ፡ ውስተ፡ ውእቱ፡ ንዋየ፡ ልሕኵት፡ ወዘመልአ፡ አግሕሚ።
5 ወአተወት፡ ቤታ፡ ወዐጸወት፡ ኆኅተ፡ ላዕሌሃ፡ ወላዕለ፡ ደቂቃ፡ ወእሙንቱ፡ ያቀርቡ፡ ላቲ፡ ወይእቲ፡ ትሰውጥ።
6 ወይእቲ፡ ትቤሎሙ፡ ለደቂቃ፡ አቅርቡ፡ ሊተ፡ ዓዲ፡ ንዋየ፡ ልሕኵት፡ ወይቤልዋ፡ ኅልቀ፡ ኵሉ፡ ንዋየ፡ ልሕኵት፡ ወእምዝ፡ ቆመ፡ ዝክቱኒ፡ ቅብእ።
7 ወሖረት፡ ወነገረቶ፡ ለብእሴ፡ እግዚአብሔር፡ ወይቤላ፡ ኤልሳዕ፡ ሖሪ፡ ሢጢ፡ ወፍድዪ፡ ዕዳኪ፡ ወሰልጢ፡ ሲሳየኒ፡ ወበዘተረፈ፡ ቅብእ፡ እሕይዊ፡ ርእሰኪ፡ ወእሕይዊ፡ ውሉደሊ።
8 ወእምዝ፡ ኀለፈ፡ ኤልሳዕ፡ አሐተ፡ ዕለተ፡ እንተ፡ ሱማን፡ ወሀለወት፡ ህየ፡ ብእሲት፡ ዐባይ፡ ወአቀመቶ፡ ይብላዕ፡ እክለ፡ እስመ፡ ጐንደየ፡ ግሒሠ፡ ህየ፡ ወተግሕሠ፡ ህየ፡ ይብላዕ፡ እክለ።
9 ወትቤሎ፡ ይእቲ፡ ብእሲት፡ ለምታ፡ ብእሴ፡ እግዚአብሔር፡ ቅዱስ፡ ውእቱ፡ ወዘልፈ፡ የኀልፍ፡ እንተ፡ ኀቤነ።
10 ወንግበር፡ ሎቱ፡ ጽርሐ፡ አሐተኔ፡ ንስቲተ፡ መካነ፡ ወንንጽፍ፡ ሎቱ፡ ዐራተ፡ ወመንበረ፡ ወተቅዋመ፡ ማኅቶት፡ ወማእደኒ፡ እንተ፡ ጊዜ፡ ኀለፈ፡ ኀቤነ፡ ይግሐስ፡ ህየ።
11 ወእምዝ፡ አሐተ፡ ዕለተ፡ ቦአ፡ ህየ፡ ወቤተ፡ ውስተ፡ ጽርሑ።
12 ወይቤሎ፡ ለግያዝ፡ ወልዱ፡ ጸውዓ፡ ሊተ፡ ለዛቲ፡ ሰሜናዊት፡ ወጸውዓ፡ ወቆመት፡ ቅድሜሁ።
13 ወይቤሎ፡ በላ፡ ናሁ፡ አክበርክኒ፡ ኵሎ፡ ዘንተ፡ ክብረ፡ ምንተ፡ እግበር፡ ለኪ ፤ እመቦ፡ ዘብኪ፡ ትካዘ፡ ኀበ፡ ንጉሥ፡ ወእመኒ፡ ኀበ፡ መልአክ ፤ ወትቤሎ፡ አንሰ፡ ሀለውኩ፡ ማእከለ፡ ሕዝብየ፡ እነብር።
14 ወይቤ፡ ምንተ፡ ንግበር፡ ላቲ፡ ወይቤሎ፡ ግያዝ፡ ወልዱ፡ መምህርት፡ ይእቲ፡ እስመ፡ ውሉደ፡ አልባቲ፡ ወምታኒ፡ ልሂቅ።
15 ወጸውዓ፡ ወቆመት፡ ኀበ፡ ኆኅት።
16 ወይቤላ፡ ኤልሳዕ፡ ዓመ፡ ከመ፡ ዮም፡ በሕይወትኪ፡ ትረክቢ፡ ውሉደ፡ ወትቤሎ፡ እግዚእየ፡ ኢተሐስዋ፡ ለአመትከ።
17 ወእምዝ፡ ፀንሰት፡ ይእቲ፡ ብእሲት፡ ወወለደት፡ ወልደ፡ በዓመት፡ ሕይወታ፡ በዕለተ፡ ይቤላ፡ ኤልሳዕ።
18 ወልህቀ፡ ውእቱ፡ ሕፃን፡ ወወፈረ፡ ኀበ፡ አቡሁ፡ ውስተ፡ ማእረር።
19 ወይቤሎ፡ ለአቡሁ፡ ርእስየ፡ ርእስየ፡ ወይቤሎ፡ ለቍልዔሁ፡ አእትዎ፡ ኀበ፡ እሙ።
20 ወአስከበቶ፡ ውስተ፡ ሕፅና፡ ላዕለ፡ ብረኪሃ፡ እስከ፡ ቀትር።
21 ወእምዝ፡ ሶበ፡ ሞተ፡ አዕረገቶ፡ ወእስከበቶ፡ ውስተ፡ ዐራቱ፡ ለብእሴ፡ እግዚአብሔር፡ ወዐጸወት፡ ላዕሌሁ፡ ወወፅአት።
22 ወጸውዐቶ፡ ለምታ፡ ወትቤሎ፡ ጸውዕ፡ ወፈኑ፡ ሊተ፡ አሐደ፡ እምውስተ፡ ደቅ፡ ወአሐደ፡ አድገ፡ እስመ፡ እሐውር፡ ኀበ፡ ብእሴ፡ እግዚአብሔር፡ ወእገብእ።
23 ወይቤላ፡ ምንተ፡ ተሐውሪ፡ ዮም፡ ኀቤሁ፡ እንዘ፡ ኢኮነ፡ ሠርቀ፡ ወርኅ፡ ወኢኮነ፡ ሰንበት፡ ወትቤለመ፡ ከመ፡ አአምኆ።
24 ወረሐኑ፡ ላቲ፡ አድገ፡ ወትቤሎ፡ ለገብራ፡ ተንሥእ፡ ንሖር፡ ወኢትክልአኒ፡ ሐዊረ፡ እምከመ፡ እቤለከ ፤ ነዓ፡ ትልወኒ፡ ወንሖር፡ ኀበ፡ ብእሲ፡ እግዚአብሔር፡ ውስተ፡ ደብረ፡ ቀርሜሎስ።
25 ወሶበ፡ ርእያ፡ ኤልሳዕ፡ ለይእቲ፡ ብእሲት፡ እንዘ፡ ትመጽእ፡ ወይቤሎ፡ ለግያዝ፡ ቍልዔሁ፡ ነያ፡ እንታክቲ፡ ብእሲት፡ ሰሜናዊት።
26 ሩጽ፡ ይእዜኒ፡ ወተቀበላ፡ ወበላ፡ ሰላም፡ ለኪ፡ ዳኅንኑ፡ ምትኪ፡ ወዳኅንኑ፡ ሕፃንኪ፡ ወትቤሎ፡ ዳኅን።
27 ወበጽሐት፡ ኀበ፡ ኤልሳዕ፡ ውስተ፡ ደብር፡ ወአኀዘቶ፡ እገሪሁ፡ ወመጽአ፡ ግያዝ፡ ይክልኣ፡ ወይቤሎ፡ ኤልሳዕ፡ ኅድጋ፡ እስመ፡ ትክዝት፡ ነፍሳ፡ ወኀብአኒ፡ እግዚአብሔር፡ ወኢነገረኒ።
28 ወትቤሎ፡ ቦኑ፡ ዘሰአልኩ፡ ወልደ፡ በኀበ፡ እግዚእየ ፤ አኮኑ፡ እቤለከ፡ ኢተሐስወኒ።
29 ወይቤሎ፡ ኤልሳዕ፡ ለግያዝ፡ ቅንት፡ ሐቌ፡ ከ፡ ወንሣእ፡ በትርየ፡ ወጾር፡ ውስተ፡ እዴከ፡ ወሖር፡ ወእመ፡ ረከብከ፡ ሰብአ፡ ኢታጻብሖ፡ ወእመቦ፡ ዘተጻብሐከ፡ ኢታውሥኦ፡ ወአንብራ፡ ለበትርየ፡ ውስተ፡ ገጹ፡ ለሕፃን።
30 ወትቤሎ፡ እሙ፡ ለውእቱ፡ ሕፃን፡ ሕያው፡ እግዚአብሔር፡ ወሕያው፡ ነፍስከ፡ ከመ፡ ኢየኀድገከ፡ ወተንሥአ፡ ኤልሳዕ፡ ወሖረ፡ ምስሌሃ።
31 ወግያዝ፡ የሐውር፡ ቅድሜሆሙ፡ ወበደሮ፡ በጺሐ፡ ግያዝ፡ ወአንበራ፡ ለበትሩ፡ ላዕለ፡ ገጹ፡ ለውእቱ፡ ሕፃን፡ ወኢነበቦ፡ ወኢሰምዖ፡ ወገብእ፡ ወተቀበሎ፡ ወነገሮ፡ ወይቤሎ፡ ኢተንሥአ፡ ሕፃን።
32 ወቦአ፡ ኤልሳዕ፡ ቤተ፡ ወረከቦ፡ ለሕፃን፡ ምውተ፡ ወይሰክብ፡ ውስተ፡ ዐራት።
33 ወቦእ፡ ኤልሳዕ፡ ቤተ፡ ወዐጸወ፡ ኆኅተ፡ ላዕለ፡ ክልኤሆሙ፡ ወጸለየ፡ ኀበ፡ እግዚአብሔር።
34 ወዐርገ፡ ወሰከበ፡ ላዕለ፡ ውእቱ፡ ሕፃን፡ ወወደየ፡ አፉሁ፡ ውስተ፡ አፉሁ፡ ወአዕይንቲሁ፡ ውስተ፡ አዕይንቲሁ፡ ወእደዊሁ፡ ዲበ፡ እደዊሁ፡ ወሰከበ፡ ላዕሌሁ፡ ወሞቀ፡ ሥጋሁ፡ ለውእቱ፡ ሕፃን።
35 ወተንሥአ፡ ወዖደ፡ ውስተ፡ ውእቱ፡ ቤት፡ ለፌኒ፡ ወለፌኒ፡ ወዐርገ፡ ካዕበ፡ ወሰከበ፡ ላዕለ፡ ውእቱ፡ ሕፃን፡ ወከማሁ፡ ገብረ፡ እስከ፡ ስብዕ፡ ወእምዝ፡ ከሠተ፡ አዕይንቲሁ፡ ውእቱ፡ ሕፃን።
36 ወጸውዖ፡ ኤልሳዕ፡ ለግያዝ፡ ወይቤሎ፡ ጸውዓ፡ ለዛቲ፡ ብእሲት፡ ሰሜናዊት፡ ወጸውዓ፡ ወቦአት፡ ኀቤሁ፡ ወይቤላ፡ ኤልሳዕ፡ ንሥኢ፡ ናሁ፡ ወልድኪ።
37 ወቦአት፡ ይእቲ፡ ብእሲት፡ ወሰገደት፡ ሎቱ፡ ወገነየት፡ ሎቱ፡ ታሕት፡ እገሪሁ፡ ወነሥአት፡ ሕፃና፡ ወወፅአት።
38 ወገብአ፡ ኤልሳዕ፡ ብሔረ፡ ገልገላ፡ ወረኃብ፡ ው[ስተ]፡ ብሔር፡ ወመጽኡ፡ ደቂቀ፡ ነቢያት፡ ወነበሩ፡ ቅድሜሁ፡ ወይቤሎ፡ ኤልሳዕ፡ ለቍልዔሁ፡ አፍልሕ፡ ጽህርተ፡ ዐቢየ፡ ወአብስል፡ ሎሙ፡ ተብሲለ፡ ለደቂቀ፡ ነቢያት።
39 ወወፈረ፡ ገዳመ፡ ይሕመል፡ ሐምለ፡ ምድር፡ ወረከበ፡ ዐጸደ፡ ወይን፡ በገዳም፡ ወቦአ፡ ወአረየ፡ በህየ፡ ሐምለ፡ ምድር፡ ወመልአ፡ ልብሶ፡ ወወደየ፡ ውስተ፡ ጽህርት፡ ወአብሰለ፡ ወኢያእመረ፡ ምንት፡ ውስቴቱ።
40 ወእምዝ፡ አቅረበ፡ ሎሙ፡ ይብልዑ፡ ለእሙንቱ፡ ወሶበ፡ በልዑ፡ ውእተ፡ ተብሲለ፡ ጸርኁ፡ ኅቡረ፡ ኵሎሙ፡ ወይቤሉ፡ ሕምዘ፡ ባቲ፡ ውስቴታ፡ ለዛቲ፡ ጽህርት፡ እንተ፡ ብእሲ፡ እግዚአብሔር፡ ወስእኑ፡ በሊዐ።
41 ወይቤ፡ ኤልሳዕ፡ እምጽኡ፡ ሐሪጸ፡ ወደዩ፡ ውስተ፡ ጽህርት፡ ወይቤሎ፡ ኤልሳዕ፡ ለግያዝ፡ ሱጥ፡ ሎሙ፡ ለሕዝብ፡ ወይብልዑ፡ ወእምዝ፡ እንከ፡ አልቦ፡ እኩየ፡ ዘተረክበ፡ ውስተ፡ ይእቲ፡ ጽህርት።
42 ወመጽአ፡ ፩ብእሲ፡ እምነ፡ ሳሪራ፡ ወአምጽአ፡ ሎቱ፡ ለብእሴ፡ እግዚአብሔር፡ እምነ፡ ቀዳሜ፡ እክሉ፡ ፳ኅብስተ፡ ሰገም፡ ወ፪ተመርተ፡ ወይቤሎ፡ ለቍልዔሁ፡ ሀቦሙ፡ ለእሉ፡ ዕደው፡ ወይብልዑ።
43 ወይቤሎ፡ ቍልዔሁ፡ ምንትኑ፡ አቀርብ፡ እሎንተ፡ ለ፻ብእሲ፡ ወይቤሎ፡ አቅርብ፡ ሎሙ፡ ለሕዝብ፡ ይብልዑ፡ እስመ፡ ከመዝ፡ ይቤ፡ እግዚአብሔር፡ ይብልዑአ፡ ወያትርፉአ።
44 ወበልዑ፡ ወአትረፉ፡ በከመ፡ ይቤ፡ እግዚአብሔር።