1 ወጸውዐ፡ ኤልሳዕ፡ ነቢይ፡ ፩እምውስተ፡ ደቀ፡ ነቢያት፡ ወይቤሎ፡ ቅንት፡ ሐቇከ፡ ወንሣእ፡ ቀርነ፡ ቅብእ፡ ምስሌከ፡ ወሖር፡ ሬማተ፡ ዘገለአድ።
2 ወባእ፡ ህየ፡ ወኅሥሦ፡ በህየ፡ ለኢዩ፡ ወልደ፡ ኢዮሳፍጥ፡ ወልደ፡ ናሜሲ፡ ወባእ፡ ወአንሥኦ፡ እማእከለ፡ አኀዊሁ፡ ወአብኦ፡ ውስተ፡ ውሳጢተ፡ ጽርሕ።
3 ወንሣእ፡ ቀርነ፡ ቅብእ፡ ወሱጥ፡ ውስተ፡ ርእሱ፡ ወበሎ፡ ከመዝ፡ ይቤ፡ እግዚአብሔር፡ ቀባእኩከአ፡ ትንግሥአ፡ ላዕለ፡ እስራኤልአ፡ ወእምዝ፡ አርኁ፡ ኆኅተ፡ ወጕየይ፡ ወኢትቁም።
4 ወሖረ፡ ውእቱ፡ ወልደ፡ ነቢይ፡ ውስተ፡ ሬማት፡ ዘገለአድ።
5 ወረከበ፡ መላእክተ፡ ሰራዊት፡ ይነብሩ፡ ወይቤ፡ ብየ፡ ዘእነግረከ፡ መልአክ፡ ወይቤ፡ ኢዩ፡ መኑ፡ እምውስቴትነ፡ ወይቤሎ፡ ኪያከ፡ መልአክ።
6 ወተንሥአ፡ ወቦአ፡ ቤተ፡ ወሶጠ፡ ቅብአ፡ ውስተ፡ ርእሱ፡ ወይቤሎ፡ ከመዝ፡ ይቤ፡ እግዚአብሔር፡ አምላከ፡ እስራኤል፡ ቀባእኩከአ፡ ትንግሥአ፡ ለሕዝበአ፡ እግዚአብሔር፡ ለእስራኤልአ ፤
7 ከመአ፡ ትሠርዎአ፡ ለቤተአ፡ አካአብ፡ እግዚእከ፡ እምቅድመ፡ ገጽየ፡ ወትትበቀል፡ ደሞሙ፡ ለነቢያት፡ ለአግብርትየ፡ ወደመ፡ ኵሎሙ፡ አግብርተ፡ እግዚአብሔር፡ እምነ፡ እዴሃ፡ ለኤልዛቤል ፤
8 ወእምእደ፡ ኵሉ፡ ቤቱ፡ ለአካአብ፡ ወትሤርዎ፡ ለቤተ፡ አካአብ፡ እስከ፡ ዘያስተአዝብ፡ በኀበ፡ አረፍት፡ ወኵሎ፡ ቅሩበ፡ ዘይከውን፡ ወኵሎ፡ ዘተረፈ፡ እምኔሆሙ፡ ውስተ፡ እስራኤል።
9 ወእሬስዮ፡ ለቤተ፡ አካአብ፡ ከመ፡ ቤተ፡ ኢዮራብአም፡ ወልደ፡ ናባጥ፡ ወከመ፡ ቤተ፡ በአስ፡ ወልደ፡ አኪያ።
10 ወለኢያዛቤል፡ ከለባት፡ ይበልዕዋ፡ በብሔረ፡ እስራኤልአ፡ ወኢትረክብአ፡ ዘይቀብራአ ፤ ወእምዝ፡ አርኀወ፡ ኆኅተ፡ ወጐየ።
11 ወወፅአ፡ ኢዩ፡ ኀበ፡ ደቀ፡ እግዚኡ፡ ወይቤልዎ፡ ሰላም፡ ለከ፡ ምንትኑ፡ መጽአ፡ ዝብእሲ፡ ኀቤከ፡ ወይቤሎሙ፡ ኢታአምርዎኑ፡ ዝብእሲ፡ ከመ፡ በከ፡ ይዛዋዕ።
12 ወይቤልዎ፡ ሐሰውከ ፤ ንግረነ፡ ዳእሙ፡ ወይቤሎሙ፡ ኢዩ፡ ለደቁ፡ ከመዝ፡ ወከመዝ፡ ይቤለኒ፡ ወይቤለኒ፡ ከመዝ፡ ይቤ፡ እግዚአብሔር፡ ቀባእኩከአ፡ ትንግሥአ፡ ለእስራኤልአ።
13 ወሶበ፡ ሰምዑ፡ አስተፋጠኑ፡ ወነጸፉ፡ አልባሲሆሙ፡ ኵሎሙ፡ ወነጸፉ፡ ሎቱ፡ ኀበ፡ ይነብር፡ ውስተ፡ መዓርግ፡ ወነፍኁ፡ ቀርነ፡ ወይቤሉ፡ ነግሠ፡ ኢዩ።
14 ወጸብአ፡ ኢዩ፡ ወልደ፡ ዮሳፍጥ፡ ወልደ፡ ናሜስ፡ ለኢዮራም፡ ወኢዮራምሰ፡ ሀሎ፡ ውስተ፡ ሬማት፡ ዘገለዓድ፡ የዐቅብዎ፡ ኵሎሙ፡ እስራኤል፡ እምነ፡ አዛሔል፡ ንጉሠ፡ ሶርያ።
15 ወገብአ፡ ኢዮራም፡ ንጉሥ፡ ኀበ፡ እስራኤል፡ ይትፈወስ፡ እምነ፡ ቍስሉ፡ ዘአቍሰልዎ፡ ሶርያ፡ አመ፡ ተቃተለ፡ ምስለ፡ አዛሔል፡ ንጉሠ፡ ሶርያ፡ ወይቤሎሙ፡ ኢዩ፡ ለእለ፡ ምስሌሁ፡ ትክሉኑ፡ መጥዎ፡ ነፍስክሙ፡ ምስሌየ፡ ዑቁ፡ እንከ፡ ወአልቦ፡ ዘያመስጠክሙ፡ ወአልቦ፡ ዘይወፅእ፡ እምነ፡ ሀገርክሙ፡ ኢይዜንውዎሙ፡ ለእስራኤል።
16 ወእምዝ፡ ሖረ፡ ኢዩ፡ ፍጡነ፡ ኀበ፡ እስራኤል፡ ወወረደ፡ ወኢዮራምሰ፡ ንጉሠ፡ እስራኤል፡ ሀለወ፡ ውስተ፡ እስራኤል፡ ይትፌወስ፡ ንድፈቶ፡ ኀበ፡ ነደፍዎ፡ ሶርያ፡ አረማዊያን፡ በሬማት፡ አመ፡ ተቃተለ፡ ምስለ፡ አዛሔል፡ ንጉሠ፡ ሶርያ፡ እስመ፡ ጽኑዕ፡ ብእሲ፡ ውእቱ፡ ወኀያል፡ ውእቱ ፤ ወአካዝያስ፡ ንጉሠ፡ ይሁዳ፡ ወረደ፡ ይርአዮ፡ ለኢዮራም።
17 ወዐርገ፡ ሰብአ፡ ዐይን፡ ውስተ፡ ማኅፈድ፡ ይርአዮሙ፡ ለእስራኤል፡ ወርእየ፡ ጸበሎሙ፡ ለእለ፡ ኢዩ፡ እንዘ፡ ይመጽኡ፡ ወይቤ፡ ናሁ፡ ጸበለ፡ እሬኢ፡ አንሰ ፤ ወይቤ፡ ኢዮራም፡ ይሖር፡ ፩ያሩጽ፡ ፈረሰ፡ ይትቀበሎሙ፡ ወይበሎሙ፡ ሰላም፡ ለክሙ።
18 ወሖረ፡ ፩አሮጸ፡ ፈረሰ፡ ወተቀበሎሙ፡ ወይቤሎሙ፡ ሰላም፡ ለክሙ፡ ይቤለክሙ፡ ንጉሥ፡ ወይቤሎ፡ ኢዩ፡ ምንተ፡ ብከ፡ ምስለ፡ ሰላም ፤ ግባእ፡ ድኅሬየ ፤ ወነገሮሙ፡ ዝኩ፡ ሰብእ፡ ዐይን፡ ወይቤሎሙ፡ በጽሐ፡ ዘለአክሙ፡ ኀቤሆሙ፡ ወኢገብአ።
19 ወፈነወ፡ ካዕበ፡ ካልአ፡ ያሩጽ፡ ፈረሰ፡ ወበጽሐ፡ ኀቤሆሙ፡ ወይቤሎሙ፡ ሰላምአ፡ ለክሙአ፡ ይቤ፡ ንጉሥ፡ ወይቤሎ፡ ኢዩ፡ ምንተ፡ ብከ፡ ምስለ፡ ሰላም ፤ ግባእ፡ ድኅሬየ።
20 ወነገሮ፡ ዝኩ፡ ሰብአ፡ ዐይን፡ ወይቤሎ፡ በጽሐ፡ ዘለአክሙ፡ ኀቤሆሙ፡ ወኢተመይጠ ፤ መሪሐ፡ ይመርሖ፡ ለኢዩ፡ ወልደ፡ ናሜሴ፡ እስመ፡ ካልእት፡ ፍኖቶሙ።
21 ወይቤ፡ ኢዮራም፡ ንዑ፡ ንሖር፡ ወአሖሩ፡ ሰረገላቲሆሙ፡ ወወፅአ፡ ኢዮራም፡ ንጉሠ፡ እስራኤል፡ ወአካዝያስ፡ ንጉሠ፡ ይሁዳ፡ ክልኤሆሙ፡ በሰረገላቲሆሙ፡ ወሖሩ፡ ወተቀበልዎ፡ ለኢዩ፡ ወረከብዎ፡ ውስተ፡ ዐጸደ፡ ናቡቴ፡ እስራኤላዊ።
22 ወይቤሎ፡ ሰላም፡ ለኢዩ፡ ወይቤሎ፡ እንከ፡ ኢዩ፡ ምንተ፡ ብከ፡ ምስለ፡ ሰላም፡ አኮኑ፡ ዝሙታ፡ ለእምካ፡ ኢያዛቤል፡ ወሥራያቲሃ፡ በዝኀ።
23 ወተመይጠ፡ ኢዮራም፡ ከመ፡ ይጕየይ፡ ወይቤሎ፡ ለአካዝ፡ ተጓሐለወነ፡ አካዝ።
24 ወወሰቀ፡ ወመሰከ፡ ቀስቶ፡ በኀይሉ፡ ወነደፎ፡ ለኢዮራም፡ ማእከለ፡ ተኬሳሁ፡ ወወፅአ፡ ሐጹ፡ እንተ፡ ውስተ፡ ልቡ፡ ወወድቀ፡ በብረኪሁ።
25 ወይቤሎ፡ ኢዩ፡ ለበዴቃ፡ ወዓሊሁ፡ ግድፎ፡ ውስተ፡ ዐጸደ፡ ናቡቴ፡ እስራኤላዊ፡ እስመ፡ አነ፡ እዜከር፡ ወለሊከ፡ ታአምር፡ አመ፡ ንጼዐን፡ አእዱገ፡ ወንተልዎ፡ ለአካአብ፡ አቡሁ፡ ወአምጽአ፡ ላዕሌሁ፡ እግዚአብሔር፡ ዘይቤ ፤
26 ደሞ፡ ለናቡቴ፡ ወደመ፡ ደቂቁ፡ ርኢኩ፡ ትማልም፡ ይቤ፡ እግዚአብሔር፡ ወእትበቀሎ፡ በዝ፡ ዐጸድ፡ ይቤ፡ እግዚአብሔር፡ ወይእዜኒ፡ ንሥኦ፡ ወግድፎ፡ ውስተዝ፡ ዐጸድ፡ በከመ፡ ይቤ፡ እግዚአብሔር።
27 ወሶበ፡ ርእየ፡ አካዝያስ፡ ንጉሠ፡ ይሁዳ፡ ጐየ፡ እንተ፡ ፍኖተ፡ ቤታን፡ ወተለዎ፡ ኢዩ፡ ወዴገኖ፡ ወይቤ፡ ኢየኀድጎ፡ ኪያሁኒ፡ ወቀተሎ፡ በውስተ፡ ሰረገላቲሁ፡ እንዘ፡ የዐርግ፡ መንገለ፡ ጋይ፡ አንተ፡ ኤብላሔም፡ ወእምህየ፡ ጐየ፡ ውስተ፡ መጌዶን፡ ወበህየ፡ ወፅአት፡ ነፍሱ።
28 ወጸዐንዎ፡ ደቁ፡ ውስተ፡ ሰረገላቲሁ፡ ወአእተውዎ፡ ውስተ፡ ኢየሩሳሌም፡ ወቀበርዎ፡ ውስተ፡ መቃብሩ፡ ውስተ፡ ሀገረ፡ ዳዊት።
29 ወአመ፡ ፲ወ፩ክረምት፡ መንግሥቱ፡ ለኢዮራም፡ ንጉሠ፡ እስራኤል፡ ነግሠ፡ አካዝያስ፡ ለይሁዳ።
30 ወሖረ፡ ኢዩ፡ ውስተ፡ እስራኤል፡ ወሰምዐት፡ ኢያዛቤል፡ ወተኵሕለት፡ አዕይንቲሃ፡ ወተሠነየት፡ ወተፀፍረት፡ ርእሳ፡ ወሐወጸት፡ እንተ፡ ውስተ፡ መስኮት።
31 ወቦአ፡ ኢዩ፡ ውስተ፡ ሀገር፡ ወትቤሎ፡ ስላም፡ ለዝንበሪ፡ ለቀታሌ፡ እግዚኡ።
32 ወአንሥአ፡ ገጾ፡ ወርእያ፡ ውስተ፡ መስኮት፡ ወይቤላ፡ መኑ፡ አንቲ፡ ረዲ፡ ዝየ፡ ኀቤየ፡ ወእምዝ፡ ሐወጹ፡ ክልኤቱ፡ ኅጽዋን።
33 ወይቤሎሙ፡ አጽድፍዋ፡ ወአጽደፍዋ፡ ወተነዝኀ፡ ደማ፡ ኀበ፡ አረፍት፡ ወኀበ፡ አፍራስ፡ ወኬድዋ።
34 ወቦአ፡ ኢዩ፡ ወበልዐ፡ ወሰትየ፡ ወእምዝ፡ ይቤ፡ ሖሩ፡ ርእይዋ፡ ለዛቲ፡ ርግምት፡ ወቅብርዋ፡ እስመ፡ ወለተ፡ ንጉሥ፡ ይእቲ።
35 ወሖሩ፡ ይቅብርዋ፡ ወኢረከቡ፡ ዘእንበለ፡ ናላሃ፡ ወሰሎና፡ እገሪሃ፡ ወእራኃተ፡ እደዊሃ።
36 ወገብኡ፡ ወነገርዎ፡ ወይቤ፡ ዝክቱ፡ ቃለ፡ እግዚአብሔር፡ ዘነበለ፡ በእደ፡ ኤልያስ፡ ትስብያዊ፡ ወይቤ፡ በውስተ፡ ዐጸደ፡ እስራኤል፡ ይበልዕዋ፡ ከለባት፡ ለኤልዛቤል ፤
37 [ወይከውን፡ በድና፡ ለኤልዛቤል፡] ከመ፡ መሬት፡ ውስተ፡ ገጸ፡ ገዳም፡ በደወለ፡ እስራኤል፡ ከመ፡ ኢይበልዋ፡ እንከ፡ ኢያዜቤል።