1 እግዚአብሔር፡ ፈጠሮሙ፡ ለእጓለ፡ እመሕያው፡ እምነ፡ ምድር፡ ወካዕበ፡ ያገብኦ፡ ውስቴታ።
2 ወወሀቦሙ፡ ዓመተ፡ መዋዕለ፡ ኍልቊ፡ ወአኰነኖሙ፡ ኵሎ፡ ዘውስቴታ።
3 ወአልበሶሙ፡ ኀይለ፡ ዘዘዚአሆሙ፡ ወበአምሳለ፡ ዚአሁ፡ ገብሮሙ።
4 ወገብረ፡ ሎሙ፡ ይፍርህዎሙ፡ ኵሉ፡ ዘነፍስ፡ ወይቅንይዎሙ፡ ለአራዊት፡ ወለአዕዋፍ።
6 ወወሀቦሙ፡ ቃለ፡ ወልሳነ፡ ወዐይነ፡ ወእዝነ፡ ወልበ፡ በዘ፡ ይኄልዩ።
7 አእምሮ፡ ጥበብ፡ አጽገቦሙ፡ ወአርአዮሙ፡ እኪተኒ፡ ወሠናይተኒ።
8 ወወደየ፡ ውስተ፡ ልቦሙ፡ ፍርሀተ፡ ከመ፡ ያርእዮሙ፡ ዕበየ፡ ግብሩ።
9 ከመ፡ ይትናገሩ፡ በዕበየ፡ ግብሩ።
10 ከመ፡ ይሰብሕዎ፡ ለስሙ፡ ቅዱስ፤
11 ወወሀቦሙ፡ ጥበበ፡ ወሕገ፡ ዘያሐይዎሙ፡ አውረሶሙ።
12 ኪዳነ፡ ዘለዓለም፡ ተካየዶሙ፡ ወነገሮሙ፡ ኵነኔሁ።
13 ወቃለ፡ ስብሐቲሁ፡ ሰምዐት፡ እዝኖመጁ።
14 ወአዘዞሙ፡ ለኵሎሙ፡ በእንተ፡ ቢጾሙ።
15 ወቅድሜሁ፡ ፍናዊሆሙ፡ በኵሉ፡ ጊዜ፡ ወአልቦሙ፡ ኀበ፡ ይትኀብኡ፡ እምነ፡ አዕይንቲሁ።
17 ወለኵሎሙ፡ አሕዛበ፡ ሤመ፡ ሎሙ፡ ነገሥተ፡ ወእስራኤል፡ ኮነ፡ ክፍለ፡ እግዚአብሔር።
19 ወኵሉ፡ ግብሮሙ፡ ከመ፡ ፀሐይ፡ በቅድሜሁ፡ ወአዕይንቲሁ፡ ዘልፈ፡ ይኔጽራ፡ ፍናዊሆሙ።
20 ወኢይትኀባእ፡ ኀጢአቶሙ፡ እምኔሁ፡ ወኵሉ፡ ጌጋዮሙ፡ ቅድመ፡ እግዚአብሔር።
22 ምጽዋቱ፡ ለሰብእ፡ ከመ፡ ማኅተም፡ ምስሌሁ፡ ዕሴቱ፡ ለሰብእ፡ ከመ፡ ብንተ፡ ዐይን፡ ትትዐቀብ፡ ሎቱ።
23 ወድኅረ፡ ይትመየጦ፡ ወየዐስዮ፡ ወፍዳ፡ ኀጢአቶሙ፡ ያገብእ፡ ላዕለ፡ ርእሶሙ።
24 ወባሕቱ፡ ወሀቦሙ፡ ፍኖተ፡ በዘ፡ ይኔስሑ፡ ወያስፌሥሖሙ፡ ለእለ፡ ቀብጹ፡ ተስፋሆሙ።
25 ተመየጥ፡ ኀበ፡ እግዚአብሔር፡ ወ[ኅድጋ፡ ለኀጢአት]፤ተጋነይ፡ ቅድሜሁ፡ ወነስሕ፡ አበሳከ።
26 ወግባእ፡ ኀበ፡ ልዑል፡ ወተመየጥ፡ እምነ፡ ዐመፃ፡ ወጽላእ፡ ኵሎ፡ ርኩስ፡[ፈድፋደ]።
27 መኑ፡ ይሴብሖ፡ ለልዑል፡ በመቃብር፡ ከመ፡ ሕያዋን፡ እለ፡ ይትጋነዩ፡ ሎቱ።
28 ወለዘ፡ሞተሰ፡ወኢከመ፡ ምንትሂ፡ ንስሓ፡ ኀለፎ፡ በሕይወትከ፡ እንዘ፡ ትትፌሣሕ፡ ሰብሖ፡ ለእግዚአብሔር።
29 እስመ፡ ዐቢይ፡ ምሕረቱ፡ ለእግዚአብሔር፡ ወይሣሀሎሙ፡ ለእለ፡ ይትጋነዩ፡ ሎቱ።
30 እስመ፡ ኢይክል፡ ኵሎ፡ ከዊነ፡ እጓለ፡ እመሕያው፡ እስመ፡ መዋቲ፡ ውእቱ፡ እጓለ፡ እመሕያው።
31 ምን[ት]፡ ይበርህ፡ እምነ፡ ፀሓይ፡ ወውእቱሂ፡ ይጠፍእ፡ ወእኩየ፡ ይኄሊ፡ ዘሥጋ፡ ወደም።
32 ወውእቱሰ፡[ኢ]ያአምር፡ ኀይለ፡ ልዕልና፡ ሰማያት፡ ወእጓለ፡ እመሕያውሰ፡ ኵሉ፡ ሐመድ፡ ወመሬት፡ ውእቱ።