1 Enoch 33
aligned by seat — same row, same verse, whatever each bible numbers it
| v | Geez |
|---|---|
| 1 | ወእምህየ፡ ሖርኩ፡ እስከ፡ አጽናፈ፡ ምድር፡ ወርኢኩ፡ በህየ፡ አራዊተ፡ ዐበይት፡ ወይትዌለጥ፡ አሐዱ፡ እምካልኡ፡ ወአዕዋፍሂ፡ ይትዌለጥ፡ ገጾሙ፡ ወስኖሙ፡ ወቃሎሙሂ፡ ይትዌለጥ፡ አሐዱ፡ እምካልኡ። |
| 2 | ወበጽባሖሙ፡ ለእሉ፡ አራዊት፡ ርኢኩ፡ አጽናፈ፡ ምድር፡ በኀበ፡ ሰማይ፡ የዐርፍ፡ ወኀዋኅወ፡ ርኅዋተ። |
| 3 | ወርኢኩ፡ እፎ፡ ይወፅኡ፡ ከዋክብተ፡ ሰማይ፡ ወኈለቁ፡ ዘእምኔሁ፡ ይወፅኡ፡ ኀዋኅወ፡ ወጸሐፍኩ፡ ኵሎ፡ ሙፃኦሙ፡ ለለ፡ አሐዱ፡ አሐዱ፡ በበ፡ ኍልቆሙ፡ ወአስማቲሆሙ፡ በደርጎሙ፡ ወምንባሮሙ፡ ወጊዜሆሙ፡ ወአውራኂሆሙ፡ በከመ፡ አርአየኒ፡ ኡርኤል፡ መልአክ፡ ዘምስሌየ፡ ሀሎ። |
| 4 | ወኵሎ፡ አርአየኒ፡ ሊተ፡ ወጸሐፎ፡ ወዓዲ፡ አስማቲሆሙ፡ ጸሐፈ፡ ሊተ፡ ወትእዛዛቲሆሙ፡ ወምግባራቲሆሙ። |