1 Enoch 51
aligned by seat — same row, same verse, whatever each bible numbers it
| v | Geez |
|---|---|
| 1 | ወበእማንቱ፡ መዋዕል፡ ታገብእ፡ ምድር፡ ማሕፀንታ፡ ወሲኦል፡ ታገብእ፡ ማሕፀንታ፡ ዘተመጠወት፡ ወሀጕል፡ ያገብእ፡ ዘይፈዲ። |
| 2 | ወየኀሪ፡ ጻድቃነ፡ ወቅዱሳነ፡ እምኔሆሙ፡ እስመ፡ ቀርበት፡ ዕለት፡ ከመ፡ እሙንቱ፡ ይድኅኑ። |
| 3 | ወበእማንቱ፡ መዋዕል፡ ይነብር፡ ኅሩይ፡ ዲበ፡ መንበሩ፡ ወኵሎ፡ ኅሊናተ፡ ጥበብ፡ እምኅሊና፡ አፉሁ፡ ያወፅእ፡ እስመ፡ እግዚአ፡ መናፍስት፡ ወሀቦ፡ ወሰብሖ። |
| 4 | ወበእማንቱ፡ መዋዕል፡ ይዘፍኑ፡ አድባር፡ ከመ፡ ሐራጊት፡ ወያንፈርዕፁ፡ ከመ፡ መሐስእ፡ ጽጉባነ፡ ሐሊብ፡ ወይከውኑ፡ ኵሎሙ፡ መላእክት፡ በሰማይ። |
| 5 | ወገጾሙ፡ ይበርህ፡ በፍሥሓ፡ እስመ፡ በእማንቱ፡ መዋዕል፡ ኅሩይ፡ ተንሥአ፡ ወምድር፡ ትትፌሣሕ፡ ወጻድቃን፡ ዲቤሃ፡ የኀድሩ፡ ወኅሩያን፡ ውስቴታ፡ የሐውሩ፡ ወያንሶስዉ። |