Isaiah 14

aligned by seat — same row, same verse, whatever each bible numbers it

← 13 15 →
vGeez
1 ወዝኵሉ፡ ይከውን፡ ፍጡነ፡ ወኢይጐነዲ፡ ዝንቱ፣፡ ወይሣሀሎ፡ እግዚአብሔር፡ ለያዕቆብ፡ ወየኀርዮ፡ ካዕበ፡ ለእስራኤል፤ ወየዐርፉ፡ ውስተ፡ ብሔሮሙ፡ ወይትዌሰኩ፡ ውስቴቶሙ፡ ፈላስያን፡ ወይትዌሰኩ፡ ውስተ፡ ቤተ፡ ያዕቆብ።
2 ወይነሥእዎሙ፡ አሕዛብ፡ ወያአትውዎሙ፡ ብሔሮሙ፣፡ ወይትካፈልዎሙ፡ ወይበዝኁ፡ ውስተ፡ ውእቱ፡ ብሔር፡ ወይከውኑ፡ በህየ፡ አግብርተ፡ ወአእማተ፣፡ ወይከውኑ፡ ፄዋ፡ እለ፡ ፄወውዎሙ፡ ወይትቀነዩ፡ እለ፡ ቀነይዎሙ።
3 ወይእተ፡ አሚረ፡ ያዐርፈከ፡ እግዚአብሔር፡ እምሕማምከ፡ ወእመዐትከ፡ ወእምቅኔከ፡ መሪር፡ ዘተቀነይከ፡ ሎሙ።
4 ወትነሥእ፡ ዘንተ፡ ነገረ፡ ላዕለ፡ መንግሥተ፡ ባቢሎን፡ ወትብል፡ ይእተ፡ አሚረ፤ እፎኑ፡ ተሥዕረ፡ ዘያቀቱ፡ ወእፎኑ፡ ተሥዕረ፡ ዘያሜምዕ።
5 እስመ፡ ቀጥቀጦ፡ እግዚአብሔር፡ ለአርዑተ፡ ኃጥኣን፡ ወለአርዑተ፡ መላእክት።
6 ወቀሠፎሙ፡ እግዚአብሔር፡ ለአሕዛብ፡ በመቅሠፍተ፡ መዐቱ፤ ወኢምሕኮሙ፡ ለአሕዛብ፡ እመቅሠፍተ፡ መዐቱ።
7 ወአዕረፈት፡ እንከ፡ ተአሚና፡ ኵላ፡ ምድር፣፡ ትኬልሕ፡ በትፍሥሕት።
8 ወይትኀሠዩ፡ ብከ፡ ዕፀወ፡ ሊባኖስ፡ ወአርዘ፡ ሊባኖስ፤ እምዘ፡ ሰከብከ፡ ኢዐርገ፡ እንከ፡ ዘይገዝመነ።
9 ሲኦልኒ፡ በታሕቱ፡ መረት፡ ወተቀበሉከ፤ ወተንሥኡ፡ ምስሌከ፡ ኵሎሙ፡ እለ፡ ያርብሕ፡ እለ፡ ኰነንዋ፡ ለምድር፣፡ እለ፡ አንሥእዎሙ፡ እመናብርቲሆሙ፡ ለኵሎሙ፡ ነገሥተ፡ ምድር።
10 ይሠጠዉከ፡ ወይብሉከ፡ ኵሎሙ፤ አንተሂጓ፡ ተሠገርከ፡ ከማነ፤ ተሥዕረጉ፡ ምክርከ።
11 ወደቀ፡ ውስተ፡ ሲኦል፡ እምክብርከ፣፡ ብዙኅ፡ ጥፍሥሕትከ፤ ወተነጸፍከ፡ ምስሐገ፡ በታሕቴከ፡ ወዐፅየት፡ ውዕየትከ።
12 እፎ፡ ወድቀ፡ እምሰማይ፡ ኮከበ፡ ጽባሕ፡ ዘይሠርቅ፡ ሶበ፡ ይገውሕ፤ ወተቀጥቀጠ፡ ውስተ፡ ምድር፡ ዘይልእክ፡ ኀበ፡ ኵሉ፡ አሕዛብ።
13 ወአንተሰ፡ ትቤ፡ በልብከ፤ አዐርግ፡ ውስተ፡ ሰማይ፤ ወአነብር፡ መንበርየ፡ መልዕልተ፡ ከዋክብተ፡ ሰማይ፤ እነብር፡ መልዕልተ፡ ደብር፡ ነዋኅ፡ ወውስተ፡ አድባር፡ ነዋኃት፡ ዘመንገለ፡ ደቡብ።
14 ወአዐርግ፡ መልዕልተ፡ ደመናት፡ ወእከውን፡ ከመ፡ ልዑል።
15 ይእዜሰኬ፡ ትጸድፍ፡ ውስተ፡ ሲኦል፡ ወትወርድ፡ ውስተ፡ መሠረታቲሃ፡ ለምድር።
16 ወያነክሩ፡ እለ፡ ርእዩከ፡ ወይብሉ፤ ዝንቱከ፡ ብእሲ፡ ዘአማሰና፡ ለምድረ፡ ጽዮን፡ ወለነገሥታ።
17 ወረሰያ፡ ለኵሉ፡ ዓለም፡ ሐቅለ፡ ወነሠተ፡ አህጉሪሃ፤ ወኢፈትሐ፡ ሙቁሓኒሃ።
18 ወአኖሞሙ፡ ለኵሎሙ፡ ነገሥተ፡ አሕዛብ፡ ለለ፡ ብእሲ፡ በክብሩ፡ ውስተ፡ ቤቱ።
19 ወኪያከኒ፡ ይገድፈከ፡ ውስተ፡ አድባር፡ ከመ፡ በድን፡ ርኩስ፤ ምስለ፡ ብዙኃን፡ አብድንት፡ እለ፡ ወጉኣን፡ በኲናት፤ እለ፡ ይወርዱ፡ ውስተ፡ ሲኦል።
20 ከመ፡ ልብስ፡ ዘምሉእ፡ ደመ፡ ዘኢኮነ፡ ንጹሐ፤ ከማሁኬ፡ አንተሂ፡ ኢኮንከ፡ ንጹሐ።
21 አስተዳሉ፡ ደቂቀከ፡ ይቅትልዎሙ፡ በኃጢአተ፡ አበዊሆሙ፤ ከመ፡ ኢይትነሥኡ፡ ወኢይረስዋ፡ ለምድር፤ ወከመ፡ ኢያብዝኁ፡ ቀትለ፡ ውስተ፡ ምድር።
22 ወእትነሣእ፡ ላዕሌሆሙ፡ ይቤ፡ እግዚአብሔር፡ ጸባኦት፡ ወአጠፍእ፡ ዘርኦሙ፡ ወስሞሙ፡ ወተረፎሙ።
23 እሬስያ፡ ለባቢሎን፡ ከመ፡ ይንበራሃ፡ አዕዋፍ፡ ውስቴታ፡ ወትከውን፡ ከመ፡ ኢምንት፤ ወእሬስያ፡ ከመ፡ ጽቡረ፡ ዐምዐም፡ ለሙስና።
24 ከመዝ፡ ይቤ፡ እግዚአብሔር፡ ጸባኦት፤ በከመ፡ ነበብኩ፡ ከማሁ፡ ይከውን፡ ወበከመ፡ መከርኩ፡ ከማሁ፡ ይነብር።
25 ከመ፡ አጥፍኦሙ፡ ለፋርስ፡ እምድርየ፡ ወእምደወልየ፤ ወይከይድዎሙ፡ ወይሠዐር፡ እምላዕሌሆሙ፡ አርዑቶሙ፣፡ ወጾሮሙ፡ ይትኀደግ፡ እመታክፍቲሆሙ።
26 ዛቲ፡ ይእቲ፡ ምክር፡ እንተ፡ መከረ፡ እግዚአብሔር፡ ላዕለ፡ ኵሉ፡ ዓለም፡ ወዛቲ፡ ይእቲ፡ እዴሁ፡ ልዕልት፡ ዲበ፡ ኵሉ፡ አሕዛብ።
27 ወመኑ፡ ይመይጥ፡ ምክሮ፡ ለእግዚአብሔር፡ ቅዱስ፤ ወመኑ፡ ይከልእ፡ እዴሁ፡ ልዑለ።
28 በዓመት፡ ዘሞተ፡ አካዝ፡ ንጉሥ፡ ኮነ፡ ዝንቱ፡ ነገር።
29 ኢትትፈሥሑ፡ ኵልክሙ፡ ኢሎፍሊ፡ ፤ እስመ፡ ተቀጥቀጠ፡ አርዑተ፡ ኃይልክሙ።
30 ወይትረዐዩ፡ ነዳያን፡ በውስቴቱ፤ ወየዐርፉ፡ ሰብእ፡ ነዳያን፡ በሰላም፤ ወያጠፍኦሙ፡ ረኃብ፡ ለዘርእከ፤ ወያኀልቆሙ፡ ለእለ፡ ተርፉ፡ እምኔከ።
31 ወውዑ፡ አናቅጸ፡ አህጉር፡ ወየአወይዋ፡ አህጉር፡ ድንጉፃት፡ ወኵሎሙ፡ ኢሎፍሊ፤ እስመ፡ እምደቡብ፡ መጽአ፡ ጢስ፤ ወኢይሄልዉ፡ እንከ።
32 ወምንተ፡ ይብሉ፡ ነገሥተ፡ አሕዛብ፤ ናሁ፡ እግዚአብሔር፡ ሣረራ፡ ለጽዮን፤ ወበእንተ፡ ዝንቱ፡ ይድኅኑ፡ ትሁታን፡ ሕዝብ።