Isaiah 26

aligned by seat — same row, same verse, whatever each bible numbers it

← 25 27 →
vGeez
1 ይእተ፡ አሚረ፡ የኀልዩ፡ ዘንተ፡ ማኅሌተ፡ ላዕለ፡ ይሁዳ፤ ወይብሉ፤ ናሁ፡ ሀገር፡ ጽንዕት፤ ወመድኃኒትነ፡ ወዘትገብር፡ አረፍተ፡ ወጥቅመ።
2 አርኅዉ፡ አናቅጸ፡ ይባእ፡ ሕዝብ፡ ዘየዐቅብ፡ ጽድቀ፡ ወይትዌከፍ፡ ርትዐ።
3 ወይትመሐፀን፡ ሰላመ፡ እስከ፡ ለዓለም፣፡ ኪያከ፡ ተወከልነ።
4 እግዚኦ፡ አምላክ፡ ዓቢይ፡ ዘለዓለም።
5 ዘአትሐትኮሙ፡ ወአውረድኮሙ፡ ለእለ፡ ይነብሩ፡ ውስተ፡ አርያም፤ ወትነፅኆን፡ ለአህጉር፡ ጽኑዓት፡ ወታወርዶን፡ እስከ፡ ምድር።
6 ወይከይዶን፡ እግረ፡ የዋሃን፡ ወትሑታን።
7 ወይከውን፡ ፍኖተ፡ ርቱዐ፡ ለጻድቃን፡ ወትጸያሕ፡ ፍኖተ፡ ራትዓን።
8 እስመ፡ ርቱዕ፡ ውእቱ፡ ፍኖተ፡ እግዚአብሔር።
9 በሌሊት፡ ትገይስ፡ መንፈስየ፡ ኀቤከ፡ እግዚኦ፡ አምላኪየ፤ እስመ፡ ብርሃን፡ ትእዛዝከ፡ በዲበ፡ ምድር።
10 እስመ፡ ኀልቀ፡ ኃጥእ፡ ዘኢይሜሀር፡ ጽድቀ፡ በዲበ፡ ምድር፤ ወዘኢይገብር፡ ሠናየ።
11 እግዚኦ፡ ልዑለ፡ መዝራዕተከ፡ ኢያእመሩ፣፡ ወእምከመሰ፡ አእመሩ፡ ይትኀፈሩ።
12 እግዚኦ፡ አምላክነ፡ ሰላመ፡ ሀበነ፡ እስመ፡ ኵሎ፡ ወሀብከነ።
13 እግዚኦ፡ አምላክነ፡ አጥርየነ፤ እግዚኦ፡ ዘእንበሌከ፡ ባዕደ፡ ኢነአምር፤ ወስመ፡ ዚአከ፡ ንሰሚ።
14 ምውታንሰ፡ ኢይሬእይዋ፡ ለሕይወት፤ ወዓቀብተ፡ ሥራይኒ፡ ያነሥኡ።
15 ወስኮሙ፡ እግዚኦ፡ እኪተ፤ ወስኮሙ፡ እኪተ፡ ለክቡራነ፡ ምድር።
16 እግዚኦ፡ በሕማምነ፡ ተዘከርናከ፤ ወበኅዳጥ፡ ሕማም፡ ገሠጽከነ።
17 ወከመ፡ እንተ፡ ውስተ፡ ማሕምም፡ ወእንተ፡ አልጸቀት፡ ለወሊድ፡ ወአውየወት፡ በሕማማ፣፡ ከማሁ፡ ኮነ፡ ለፍቁርከ።
18 በእንተ፡ ፈሪሆትከ፡ እግዚኦ፡ ፀነስነ፣፡ ሐመምነሂ፡ ወወለድነ፡ መመንፈሰ፡ አድኅኖትከ፡ በዲበ፡ ምድር።
19 ምውታንሰ፡ ይትነሥኡ፡ ወየሐይዉ፡ እለ፡ ውስተ፡ መቃብር፤ ወይትፌሥሑ፡ እለ፡ ውስተ፡ ምድር።
20 ሖር፡ ሕዝብየ፡ ወባእ፡ ቤተከ፡ ወዕጹ፡ ኆኅጠከ፡ ወተኀባእ፡ ኅዳጠ፡ ምዕረ፡ እስከ፡ የኀልፍ፡ መዐቱ፡ ለእግዚአብሔር።
21 ናሁ፡ እግዚአብሔር፡ መቅደሱ፡ ያመጽእ፡ መቅሠፍተ፡ ዲበ፡ እለ፡ ይነብሩ፡ ውስተ፡ ምድር፤ ወትከሥት፡ ምድርኒ፡ ደማ፡ ወኢትከድኖሙ፡ ለቅቱላን።