Isaiah 8

aligned by seat — same row, same verse, whatever each bible numbers it

← 7 9 →
vGeez
1 ወይቤለኒ፡ እግዚአብሔር፤ ንሣእ፡ ለከ፡ ጦማረ፡ ክርታስ፡ ዓቢየ፡ ወሐዲሰ፡ ወጸሐፍ፡ ውስቴቱ፡ መጽሐፈ፡ በብረዓ፡ እጓለ፡ እመሕያው፡ ዘይብል፤ ፍጡነ፡ ፄውው፡ ወማህርክ።
2 ወአስምዕ፡ ሊተ፡ ሰብአ፡ ምእመናነ፡ አርያሃ፡ ወዘካርያስሃ፡ ወልደ፡ በራክዩ።
3 ወሖርኩ፡ በበ፡ ብእሲት፡ ነቢይት፡ ወፀንሰት፡ ወወለደት፡ ወልደ።
4 እስመ፡ ዘእንበለ፡ ያእምር፡ ሕፃን፡ ሰምየ፡ አቡሁ፡ ወእሙ፣፡ ይነሥእ፡ ኃይለ፡ ደማስቆ፡ ወምህርካ፡ ሰማርያ፡ በቅድመ፡ ንጉሠ፡ ፋርስ።
5 ወይቤለኒ፡ እግዚአብሔር፡ ዳግመ፡ ዓዲሂ።
6 እስመ፡ ኢፈቀዱ፡ ዝንቱ፡ ሕዝብ፡ ማየ፡ ሰሊሆም፡ ዘየሐውር፡ ጽሚተ፡ ወይፈቅዱ፡ ይርከብዎ፡ ለረአሶን፡ ወልደ፡ ሮሜልዩ፡ ያንግሡ፡ ለክሙ።
7 በእንተ፡ ዝንቱ፡ ናሁ፡ ያመጽእ፡ እግዚአብሔር፡ ላዕሌክሙ፡ ማየ፡ ፈለግ፡ ብዙኀ፡ ወኃይለ፣፡ ንጉሠ፡ ፋርስ፡ በኵሉ፡ ክብሩ።
8 ወያጠፍእ፡ እምይሁዳ፡ ብእሴ፡ ተባዕተ፡ ወያኀልቆሙ፡ ለኃያላን።
9 አእምሩ፡ አሕዛብ፡ ወተመውኡ፤ ስምዑ፡ እስከ፡ አጽናፈ፡ ምድር፡ ወተመውኡ፡ ኃያላን፤ ወእመሂ፡ ካዕበ፡ ጸናዕክሙ፡ ካዕበ፡ ትትመውኡ።
10 ወእመሂ፡ መከርክሙ፡ ምክረ፡ ይመይጥ፡ እግዚአብሔር፡ ምክረክሙ፤ ወነገርኒ፡ ዘተናገርክሙ፡ ኢይከውነክሙ፡ እስመ፡ እግዚአብሔር፡ ምስሌነ።
11 ከመዝ፡ ይቤ፡ እግዚአብሔር፡ ጸባኦት፡ እንዘ፡ ይጌሥጸኒ፡ በእዴሁ፡ ጽንዕት፡ ወይዛለፈኒ፡ በቃለ፡ አፉሁ፡ እንዘ፡ ይብል፤ ኢትሖር፡ በፍኖተ፡ ዝንቱ፡ ሕዝብ።
12 ኢትበሉ፡ ዕጹበ።
13 ለእግዚአብሔር፡ ቀድስዎ፡ ወውእቱ፡ ይከውነከ፡ ግርማከ።
14 ወእመሂ፡ ተወከልከ፡ ቦቱ፡ ይቄድሰከ፡ ወኢያዐቅፈከ፡ ከመ፡ እብነ፡ ዕቅፍት፡ ወኢከመ፡ ኰኵሕ፡ ዘያድኅፅ።
15 ወበበይነ፡ ዝንቱ፡ ይደክሙ፡ ብዙኃን፡ እምውስቴቶሙ፡ ወይወድቁ፡ ወይትቀጠቀጡ፡ ወይቀርቡ፡ ወያሠግሩ፡ ሰብአ።
16 ወያጸንዑ፡ ይእተ፡ አሚረ፡ እሙንቱ፡ እለ፡ የኀትምዋ፡ ለኦሪት፡ ከመ፡ ኢይትመሀርዋ።
17 ወይብል፤ እጸንሖ፡ ለእግዚአብሔር፡ ዘሜጠ፡ ገጾ፡ እምቤተ፡ ያዕቆብ፡ ወእትዌከል፡ ቦቱ።
18 ነየ፡ አነ፡ ወደቂቅየ፡ ዘወሀበኒ፡ እግዚአብሔር።
19 ወእመቦ፡ ዘይቤሉክሙ፤ ኅሥዎሙ፡ ለእለ፡ ይትናገሩክሙ፡ እምታሕተ፡ ምድር፡ ወለእለ፡ በፃውዕ፡ እለ፡ ይትናገሩ፡ ከንቶ፡ ወይነቡ፡ ሐሰተ፡ እምልቦሙ፤ አኮኑ፡ አሕዛብ፡ ይስእሉ፡ ኀበ፡ ጣዖቶሙ፤ እለ፡ የኀሡ፡ በእንተ፡ ሕያዋን፡ እምኀበ፡ ምውታን።
20 እስመ፡ ሕገ፡ ወሀበ፡ ለረድኤት፡ ከመ፡ ይበሉ፤ ኢኮነ፡ ከመዝ፡ ነገሩ፡ ወኢየሀቡ፡ ሐፍሠ፡ በእንቲአሁ።
21 ወበዝ፡ ይመጽእ፡ ላዕሌክሙ፡ ረኃብ፡ ወእምከመ፡ ርኅብክሙ፡ ትቴክዙ፡ ወትነቡ፡ ሕሡመ፡ ላዕለ፡ መላእክት፡ ወላዕለ፡ መኳንንት፡ ወትኔጽሩ፡ ላዕለ፡ ውስተ፡ ሰማይ።
22 ወታሕተ፡ ውስተ፡ ምድር፤ ወትሬእዩ፡ ጽፉቀ፡ ጽልመተ፡ ወትትመነደቡ፡ ዓቢየ፡ ምንዳቤ፤ ተሐሙ፡ ወትጼነሱ፤ ይጸልመክሙ፡ ቅድሜክሙ፡ ወኢትሬእዩ፡ ወኢይትበላሕ፡ ዘተመንደበ፡ እስከ፡ አመ፡ ይበጽሕ፡ ዕድሜሁ፡ ለዝ።