Joshua 3

aligned by seat — same row, same verse, whatever each bible numbers it

← 2 4 →
vGeez
1 ወጌሠ ፡ በጽባሕ ፡ ኢየሱስ ፡ ወግዕዙ ፡ እምነ ፡ ሳጢን ፡ ወበጽሑ ፡ እስከ ፡ ዮርዳንስ ፡ ውእቱ ፡ ወኵሉ ፡ ደቂቀ ፡ እስራኤል ፡ ወኀደሩ ፡ ህየ ፡ እንበለ ፡ ይዕድዉ ።
2 ወእምድኅረ ፡ ሠሉስ ፡ መዋዕል ፡ ቦኡ ፡ ጸሐፍት ፡ ማእከለ ፡ ትዕይንት ።
3 ወአስተኃለፉ ፡ ለሕዝብ ፡ ወይቤሉ ፡ እምከመ ፡ ርኢክሙ ፡ ታቦተ ፡ ሕጉ ፡ ለእግዚአብሔር ፡ አምላክነ ፡ ወካህናቲነ ፡ ወሌዋውያኒነ ፡ እንዘ ፡ ይጸውርዋ ፡ ገዐዙ ፡ አንትሙኒ ፡ እምነ ፡ መካናቲክሙ ፡ ወትልዉ ፡ ድኅሬሃ ።
4 ወባሕቱ ፡ ርሑቀ ፡ [ይኩን ፡] ማእከሌክሙ ፡ ወማእከሌሃ ፡ መጠነ ፡ ዕሥራ ፡ ምእት ፡ በእመት ፡ ወበመስፈርቱ ፡ ቁሙ ፡ ወኢትቅረብዋ ፡ ከመ ፡ ታእምሩ ፡ ውስተ ፡ ፍኖት ፡ እንተ ፡ ተሐውሩ ፡ እስመ ፡ ኢሖርክምዋ ፡ ለይእቲ ፡ ፍኖት ፡ ትካት ።
5 ወይቤሎሙ ፡ ኢየሱስ ፡ ለሕዝብ ፡ አንጽሑ ፡ ርእሰክሙ ፡ ለጌሠም ፡ እስመ ፡ ጌሠመ ፡ ይገብር ፡ እግዚአብሔር ፡ መድምመ ፡ ለክሙ ።
6 ወይቤሎሙ ፡ ኢየሱስ ፡ ለካህናት ፡ እንዘ ፡ ይብል ፡ ንሥኡ ፡ ታቦተ ፡ ሕጉ ፡ ለእግዚአብሔር ፡ ወሑሩ ፡ ቅድመ ፡ ሕዝብ ፡ ወነሥኡ ፡ ካህናት ፡ ታቦተ ፡ ሕጉ ፡ ለእግዚአብሔር ፡ ወሖሩ ፡ ቅድመ ፡ ሕዝብ ።
7 ወይቤሎ ፡ እግዚአብሔር ፡ ለኢየሱስ ፡ ናሁ ፡ በዛቲ ፡ ዕለት ፡ እእኅዝ ፡ ኣዕቢከ ፡ ቅድመ ፡ ኵሉ ፡ ደቂቀ ፡ እስራኤል ፡ ከመ ፡ ያእምሩ ፡ ከመ ፡ ሀለውኩ ፡ ምስሌከ ፡ በከመ ፡ ሀለውኩ ፡ ምስለ ፡ ሙሴ ።
8 ወይእዜኒ ፡ አዝዞሙ ፡ ለካህናት ፡ እለ ፡ ይጸውሩ ፡ ታቦተ ፡ ወበሎሙ ፡ እምከመ ፡ ቦእክሙ ፡ ውስተ ፡ ጽንፈ ፡ ማዩ ፡ ለዮርዳንስ ፡ ቁሙ ፡ ውስቴቱ ፡ ለዮርዳንስ ።
9 ወይቤሎሙ ፡ ኢየሱስ ፡ ለደቂቀ ፡ እስራኤል ፡ ቅረቡ ፡ ዝየ ፡ ወስምዑ ፡ ቃለ ፡ እግዚአብሔር ፡ አምላክነ ።
10 ወይቤሎሙ ፡ ኢየሱስ ፡ በዝንቱ ፡ ተአምሩ ፡ ከመ ፡ ሕያው ፡ ውእቱ ፡ እግዚአብሔር ፡ ዘምስሌክሙ ፡ ወአጥፍኦ ፡ ያጠፍኦሙ ፡ እምቅድመ ፡ ገጽክሙ ፡ ለከናኔዎን ፡ [ወለኬጤዎን ፡] ወለፌሬዜዎን ፡ ወለኤዌዎን ፡ ወለአሞሬዎን ፡ ወለኢያቡሴዎን ፡ ወለጌርጌሴዎን ።
11 ወናሁ ፡ ታቦተ ፡ ሕጉ ፡ ለእግዚአብሔር ፡ ውስተ ፡ ኵሉ ፡ ምድር ፡ [ተዐዱ ፡ ቅድሜክሙ ፡] ዮርዳንስ ።
12 ወኅረዩ ፡ ለክሙ ፡ ዐሠርተ ፡ ወክልኤተ ፡ ዕደወ ፡ እምነ ፡ ደቂቀ ፡ እስራኤል ፡ አሐደ ፡ አሐደ ፡ ብእሴ ፡ እምነ ፡ አሐዱ ፡ አሐዱ ፡ ነገድ ።
13 ወሶበ ፡ አቀሙ ፡ እገሪሆሙ ፡ ካህናት ፡ እለ ፡ ይጸውሩ ፡ ታቦተ ፡ ሕጉ ፡ ለእግዚአብሔር ፡ ውስተ ፡ ኵሉ ፡ ምድር ፡ በውስተ ፡ ማየ ፡ ዮርዳንስ ፡ ይነጽፍ ፡ ማየ ፡ ዮርዳንስ ፡ ወማይኒ ፡ ዘይወርድ ፡ እምነ ፡ ላዕሉ ፡ ይቀውም ።
14 ወእምዝ ፡ ሶበ ፡ ግዕዘ ፡ ሕዝብ ፡ እምነ ፡ መኃድሪሆሙ ፡ ከመ ፡ ይዕድውዎ ፡ ለዮርዳንስ ፡ ወካህናትሰ ፡ ጾሩ ፡ ታቦተ ፡ ሕግ ፡ ወሖሩ ፡ ቅድመ ፡ ሕዝብ ።
15 ወሶበ ፡ ቦኡ ፡ ካህናት ፡ እለ ፡ ይጸውሩ ፡ ታቦተ ፡ ሕግ ፡ ውስተ ፡ ዮርዳንስ ፡ ወተጠምቃ ፡ እገሪሆሙ ፡ ለካህናት ፡ እለ ፡ ይጸውሩ ፡ ታቦተ ፡ ሕግ ፡ ውስተ ፡ ጽንፉ ፡ ለማየ ፡ ዮርዳንስ ፡ ወምሉእ ፡ ውእቱ ፡ ዮርዳንስ ፡ እስከ ፡ ድንጋጊሁ ፡ ከመ ፡ አመ ፡ መዋዕለ ፡ ክረምት ፡ ወከመ ፡ አመ ፡ ይሠዊ ፡ ስርናይ ፤
16 ወቆመ ፡ ማይ ፡ ዘይወርድ ፡ እምነ ፡ ላዕሉ ፡ ወቆመ ፡ ከመ ፡ አረፍት ፡ እንዘ ፡ ያርሕቅ ፡ ቀዊመ ፡ ጥቀ ፡ ወጥቀ ፡ እስከ ፡ ደወለ ፡ ቀርያታያርም ፡ ወዝክቱሰ ፡ ዘይወርድ ፡ ወረደ ፡ ውስተ ፡ ባሕር ፡ ዘአራባ ፡ ወባሕረ ፡ አሎን ፡ ወነጽፈ ፡ ወየብሰ ፡ ወቆመ ፡ ሕዝብ ፡ አንጻረ ፡ ኢያሪከ ።
17 ወቆሙ ፡ ካህናት ፡ እለ ፡ ይጸውሩ ፡ ታቦተ ፡ ሕጉ ፡ ለእግዚአብሔር ፡ ውስተ ፡ ይቡስ ፡ በማእከለ ፡ ዮርዳንስ ፡ ርሱያኒሆሙ ፡ ወኵሉ ፡ ደቂቀ ፡ እስራኤል ፡ ዐደዉ ፡ እንተ ፡ ማእከለ ፡ ይቡስ ፡ እስከ ፡ ተገምረ ፡ ኵሉ ፡ ሕዝብ ፡ ወዐደዉ ፡ ዮርዳንስ ።