Jubilees 32

aligned by seat — same row, same verse, whatever each bible numbers it

← 31 33 →
vGeez
1 ወኀደረ ፡ በይእቲ ፡ ሌሊት ፡ ውስተ ፡ ቤቴል ፡ ወሐለመ ፡ ሌዊ ፡ ከመ ፡ ሤምዎ ፡ ወረሰይዎ ፡ ለክህነት ፡ ለአምላክ ፡ ልዑል ፡ ኪያሁ ፡ ወውሉዶ ፡ እስከ ፡ ለዓለም ።
2 ወጌሰ ፡ ያዕቆብ ፡ በነግህ ፡ አመ ፡ ዐሡሩ ፡ ወረቡዑ ፡ ለዝ ፡ ወርኅ ።
3 ወበውእቶን ፡ መዋዕል ፡ ፀንሰት ፡ ይእቲ ፡ ራሔል ፡ ብንያምሃ ፡ ወልዳ ፡ ወኆለቈ ፡ እምኔሁ ፡ ያዕቆብ ፡ ወልዶ ።
4 ወአመ ፡ ወሡሩ ፡ ወኀሙሱ ፡ ለዝ ፡ ወርኅ ፡ አብአ ፡ ውስተ ፡ ምሥዋዕ ፡ አስዋረ ፡ እምአልህምት ፡ ዐሠርተ ፡ ወአርባዕተ ፡ ወአብሐኰ ፡ ዕሥራ ፡ ወሰማኒተ ፡ ወአባግዐ ፡ አርብዓ ፡ ወተስዐተ ፡ ወመሓስአ ፡ ስሳ ፡ ወመሓስአ ፡ ጠሊ ፡ ዕሥራ ፡ ወተስዐተ ፡ ጽንሐሐ ፡ ውስተ ፡ ምሥዋዕ ፡ ወቍርባነ ፡ ሥሙረ ፡ ለመዓዛ ፡ ሠናይ ፡ ቅድመ ፡ አምላክ ።
5 ዝውእቱ ፡ መባኡ ፡ እምጸሎት ፡ እንተ ፡ ጸለየ ፡ ከመ ፡ የዐሥር ፡ ምስለ ፡ መሥዋዕቶሙ ፡ ወለሞጻሕቶሙ ።
6 ወሶበ ፡ በልዖ ፡ እሳት ፡ የዐጥን ፡ ስኂነ ፡ ዲቤሁ ፡ ለእሳት ፡ መልዕልቶ ።
7 ወሀሎ ፡ እንዘ ፡ ይበልዕ ፡ ውእቱ ፡ ወኵሎሙ ፡ ውሉዱ ፡ ወሰብኡ ፡ በፍሥሓ ፡ በህየ ፡ ሰቡዐ ፡ መዋዕለ ፡ ወይባርኮ ፡ ወያአኵቶ ፡ ለእግዚአብሔር ፡ ለዘ ፡ ባልሖ ፡ እምኵሉ ፡ ምንዳቤሁ ፡ ወለዘ ፡ ወሀቦ ፡ ጸሎቶ ።
8 ወዐሠረ ፡ ኵሎ ፡ እንስሳ ፡ ንጹሐ ፡ ወገብሮ ፡ ጽንሐሐ ፡ ወእንስሳ ፡ ርኩሰ ፡ ወሀቦ ፡ ለሌዊ ፡ ወልዱ ፡ ወነፍሳተ ፡ ሰብእ ፡ ኵሎ ፡ ወሀቦ ።
9 ወተክህነ ፡ ሌዊ ፡ በቤቴል ፡ ቅድመ ፡ ያዕቆብ ፡ አቡሁ ፡ እምዐሠርቱ ፡ አኃዊሁ ፡ ወሀሎ ፡ ህየ ፡ ካህነ ።
10 ወበእንተዝ ፡ ሥሩዕ ፡ ውስተ ፡ ጽላተ ፡ ሰማይ ፡ ሕግ ፡ ለዐሥሮ ፡ ዓሥራት ፡ ካዕበ ፡ ለበሊዖቱ ፡ በቅድመ ፡ እግዚአብሔር ፡ በመካን ፡ በኀበ ፡ ተኀርየ ፡ ይኅድር ፡ ስሙ ፡ ላዕሌሁ ፡ ዓም ፡ እምዓም ።
11 ውእቱ ፡ ሥርዐት ፡ ጽሑፍ ፡ ለገቢሮቱ ፡ ዓመት ፡ እምዓመት ፡ ለበሊዐ ፡ ዓሥራት ፡ ዳግመ ፡ ቅድመ ፡ እግዚአብሔር ፡ በመካን ፡ በኀበ ፡ ተኀርየ ።
12 እስመ ፡ በዓመቲሁ ፡ ይትበላዕ ፡ ዘርእ ፡ እስከ ፡ አመ ፡ መዋዕለ ፡ ሐሪፍ ፡ ዘርአ ፡ ዓመት ፡ ወወይን ፡ እስከ ፡ አመ ፡ መዋዕለ ፡ ወይን ፡ ወለዘይት ፡ እስከ ፡ አመ ፡ መዋዕለ ፡ ጊዜ ፡ መዋዕሊሁ ።
13 ኵሉ ፡ ዘይተርፍ ፡ እምኔሁ ፡ ወዘይበሊ ፡ ይኩን ፡ ስኡበ ፡ በእሳት ፡ የዐይ ፡ እስመ ፡ ኮነ ፡ ርኩሰ ፡
14 ወከማሁ ፡ ይብልዕዎ ፡ ኅቡረ ፡ በቤት ፡ ቅዱስ ፡ ወኢያብልይዎ ፡
15 ወኵሉ ፡ ዓሥራተ ፡ ላህም ፡ ወአባግዕ ፡ ቅዱስ ፡ ለእግዚአብሔር ፡ ወለካህናቲሁ ፡ ይኩን ፡ ዘይበልዑ ፡ በቅድሜሁ ፡ ዓመት ፡ እምዓመት ።
16 ወበሌሊት ፡ ካልእት ፡ አመ ፡ ዕሥራ ፡ ወሰኑዩ ፡ ለመዋዕለ ፡ ዝወርኅ ፡ መከረ ፡ ያዕቆብ ፡ ከመ ፡ ይሕንጽ ፡ ውእተ ፡ መካነ ፡ ወከመ ፡ ይጥቅም ፡ ዐጸደ ፡ ወይቀድሶ ፡ ወከመ ፡ ይግበሮ ፡ ቅዱሰ ፡ ዘለዓለም ፡ ሎቱ ፡ ወለውሉዱ ፡ እስከ ፡ ለዓለም ፡ እምድኅሬሁ ።
17 ወአስተርአዮ ፡ እግዚአብሔር ፡ በሌሊት ፡ ወባረኮ ፡ ወይቤሎ ፡ ኢይጸዋዕ ፡ ስምከ ፡ ያዕቆብሃ ፡ ባሕቲቶ ፡ አላ ፡ እስራኤልሃ ፡ ይሰምዩ ፡ ስምከ ።
18 ወይቤሎ ፡ ካዕበ ፡ አነ ፡ ውእቱ ፡ እግዚአብሔር ፡ ዘፈጠርኩ ፡ ሰማየ ፡ ወምድረ ፡ ወአልህቀከ ፡ ወአበዝኀከ ፡ ፈድፋደ ፡ ጥቀ ፡ ወነገሥት ፡ እምኔከ ፡ ይከውኑ ፡ ወይኴንኑ ፡ በኵለሄ ፡ ወእደ ፡ ኬደ ፡ አሰረ ፡ ውሉደ ፡ ሰብእ ።
19 ወእሁብ ፡ ለዘርእከ ፡ ኵላ ፡ ምድረ ፡ ዘመትሕተ ፡ ሰማይ ፡ ወይኴንኑ ፡ ውስተ ፡ ኵሉ ፡ አሕዛብ ፡ በከመ ፡ ፈቀዱ ፡ ወእምድኅረዝ ፡ ያስተጋብኡ ፡ ኵላ ፡ ምድረ ፡ ወይወርስዋ ፡ ለዓለም ፡ 20 ወፈጸመ ፡ ተናገሮ ፡ ምስሌሁ ፡ ወዐርገ ፡ እምኀቤሁ ፡ ወይሬኢ ፡ ያዕቆብ ፡ እስከ ፡ ሶበ ፡ ዐርገ ፡ ውስተ ፡ ሰማይ ።
21 ወርእየ ፡ በራእየ ፡ ሌሊት ፡ ወናሁ ፡ መልአክ ፡ ይወርድ ፡ እምሰማይ ፡ ወሰብዑ ፡ ሰሌዳት ፡ ውስተ ፡ እደዊሁ ፡ ወወሀቦ ፡ ለያዕቆብ ፡ ወአንበቦን ፡ ወአንበበ ፡ ኵሎ ፡ ዘጽሑፍ ፡ ውስቴቶን ፡ ዘይከውን ፡ ሎቱ ፡ ወለውሉዱ ፡ በኩሉ ፡ ዓለማት ።
22 ወአርአዮ ፡ ኵሎ ፡ ዘጽሑፍ ፡ ውስተ ፡ ሰሌዳት ፡ ወይቤሎ ፡ ኢትሕንጽ ፡ ዘንተ ፡ መካነ ፡ ወኢትግበሮ ፡ መቅደሰ ፡ ዘለዓለም ፡ ወኢትኅድር ፡ ዝየ ፡ እስመ ፡ አኮ ፡ ዝመካን ።
23 እስመ ፡ በግብጽ ፡ ትመውት ፡ በሰላም ፡ ወበዛ ፡ ምድር ፡ ትትቀበር ፡ በክብር ፡ ውስተ ፡ መቃብረ ፡ አበዊከ ፡ ምስለ ፡ አብርሃም ፡ ወይስሐቅ ።
24 ኢትፍራህ ፡ እስመ ፡ በከመ ፡ ርኢከ ፡ ወአንበብከ ፡ ከማሁ ፡ ይከውን ፡ ኵሉ ፡ ወአንተሂ ፡ ጸሐፍ ፡ ኵሎ ፡ ዘከመ ፡ ርኢከ ፡ ወአንበብከ ፡
25 ወይቤ ፡ ያዕቆብ ፡ እግዚኦ ፡ እፎ ፡ እዜከር ፡ ዘከመ ፡ አንበብኩ ፡ ወርኢኩ ፡ ኵሎ ።
26 ወዐርገ ፡ እምኀቤሁ ።
27 ወገብረ ፡ በህየ ፡ ዓዲ ፡ ዕለተ ፡ አሐተ ፡ ወሦዐ ፡ ባቲ ፡ በከመ ፡ ኵሉ ፡ ዘይሠውዕ ፡ በመዋዕለ ፡ ቀዳሚያት ፡ ወጸውዐ ፡ ስማ ፡ ቶሳከ ፡ እስመ ፡ ተወሰከት ፡ ይእቲ ፡ ዕለት ፡ ወለቀዳሚያት ፡ ጸውዖን ፡ በዓለ ።
28 ወከመዝ ፡ ያስተርኢ ፡ ውእቱ ፡ ከመ ፡ ትኩን ፡ ወጽሑፍ ፡ ውስተ ፡ ጽላተ ፡ ሰማይ ።
29 ወተጸውዐ ፡ ስማ ፡ ቶሳከ ፡ እስመ ፡ እንተ ፡ ያዐርጉ ፡ ይእቲ ፡ በስምዐ ፡ መዋዕለ ፡ በዓል ፡ በከመ ፡ ኆልቈ ፡ መዋዕል ፡ ዘዓመት ።
30 ወበሌሊት ፡ አመ ፡ ዕሥራ ፡ ወሠሉሱ ፡ ለዝ ፡ ወርኅ ፡ ሞተት ፡ ዲቦራ ፡ ሐፃኒተ ፡ ርብቃ ፡ ወቀበርዋ ፡ መትሕተ ፡ ሀገር ፡ ታሕተ ፡ ባላን ፡ ዘፈለግ ፡ ወጸውዐ ፡ ስሞ ፡ ለውእቱ ፡ መካን ፡ ፈለገ ፡ ዲቦራ ፡ ወበላኖንሃ ፡ በላኖን ፡ ለሐ ፡ ዲቦራ ።
31 ወሖረት ፡ ርብቃ ፡ ወገብአት ፡ ውስተ ፡ ቤት ፡ ኀበ ፡ አቡሁ ፡ ይስሐቅ ።
32 ወሖረ ፡ እምድኅሬሃ ፡ ለእሙ ፡ እስከ ፡ ቀርበ ፡ ምድረ ፡ ከብራታን ፡ ወኀደረ ፡ ህየ ።
33 ወወለደት ፡ ራሔል ፡ በሌሊት ፡ ወልደ ፡ ወጸውዐት ፡ ስሞ ፡ ወልደ ፡ ሕማምየ ፡ እስመ ፡ ዐጸበት ፡ ሶበ ፡ ትወልዶ ፡ ወአቡሁሰ ፡ ጸውዐ ፡ ስሞ ፡ ብንያምሃ ።
34 ወሞተት ፡ በህየ ፡ ራሔል ፡ ወተቀብረት ፡ ውስተ ፡ ምድረ ፡ ኤፍራታ ፡ እንተ ፡ ይእቲ ፡ ቤተ ፡ ልሔም ።