Kebra Nagast 10
aligned by seat — same row, same verse, whatever each bible numbers it
| v | Geez |
|---|---|
| 1 | ፲ ፡ በእንተ ፡ ጽዮን ። ወእምሕል ፡ በርእስየ ፡ ወበጽዮን ፡ ታቦተ ፡ ኪዳንየ ፡ እንተ ፡ ፈጠርክዋ ፡ ለምሥሃል ፡ ወለመድኀኒተ ፡ ሰብእ ፡ ወኣወርዳ ፡ በደኃሪ ፡ ለዘርእከ ፡ ወእሠምር ፡ መሥዋዕተ ፡ ደቂቅከ ፡ በዲበ ፡ ምድር ፡ ወትሄሉ ፡ ምስሌሆሙ ፡ ታቦተ ፡ ኪዳንየ ፡ ለዓለም ፡ ወሶበኒ ፡ መጽአ ፡ ደመና ፡ ከመ ፡ ኢይፍርሁ ፡ ወኢይምሰሎሙ ፡ አይኅ ፡ ኣወርድ ፡ እማኅደረ ፡ ጽዮን ፡ ቀስተ ፡ ኪዳንየ ፡ ዘይኬልላ ፡ ለታቦተ ፡ ሕግየ ፡ ዝውእቱ ፡ ቀስተ ፡ ደመና ፤ ወሶበኒ ፡ በዝኀ ፡ ኀጢአቶሙ ፡ ወፈቀድኩ ፡ እትመዐዖሙ ፡ እዜከራ ፡ ለታቦተ ፡ ኪዳንየ ፡ ወእሬስያ ፡ ለቀስተ ፡ ደመና ፡ ወኣአትት ፡ መዐትየ ፡ ወእፌኑ ፡ ሣህልየ ፤ ወአንሰ ፡ ኢይረስዕ ፡ ቃልየ ፡ ወኢይሔሱ ፡ ዘወፅአ ፡ እምአፉየ ፡ ወለእመኒ ፡ ኀለፈ ፡ ሰማይ ፡ ወምድር ፡ ወቃልየሰ ፡ ኢየኀልፍ ፨ ፡ አውሥእዎ ፡ ወይቤልዎ ፡ እለ ፡ ህየ ፡ ሊቃነ ፡ ጳጳሳት ፡ ለብፁዕ ፡ ጎርጎርዮስ ፤ ናሁኬ ፡ ይእዜ ፡ ለበውነ ፡ ጥዩቀ ፡ ከመ ፡ እምቅድመ ፡ ኵሉ ፡ ፍጥረት ፡ እመኒ ፡ መላእክት ፡ ወእምቅድመ ፡ ሰማያት ፡ ወምድር ፡ ወእምቅድመ ፡ ምጽናዓት ፡ ወልጐታተ ፡ ባሕር ፡ ዘፈጠራ ፡ ለታቦተ ፡ ኪዳን ፡ ዛቲ ፡ ይእቲ ፡ እንተ ፡ በሰማያት ፡ ታንሶሱ ፡ ዲበ ፡ ምድር ፨ |