Kebra Nagast 9
aligned by seat — same row, same verse, whatever each bible numbers it
| v | Geez |
|---|---|
| 1 | ፱ ፡ በእንተ ፡ ኪዳነ ፡ ኖሕ ። ወእምዝ ፡ አዕረፈ ፡ ኖሕ ፡ ጻድቅ ፡ ወነግሠ ፡ ሴም ፡ በጥበብ ፡ ወበጽድቅ ፡ እስመ ፡ ተባረከ ፡ በኀበ ፡ ኖሕ ፡ እንዘ ፡ ይብል ፡ ኩን ፡ እግዚአ ፡ ለእኁከ ፤ ወለካምኒ ፡ ይቤሎ ፡ ኩን ፡ ገብረ ፡ ለእኁከ ፤ ወለያፌትኒ ፡ ይቤሎ ፡ ተገበር ፡ ወተአዛዜ ፡ ኩን ፡ ለሴም ፡ ዋርስየ ፡ ወካዕበ ፡ እምድኅረ ፡ አይኅኒ ፡ ኢኀደገ ፡ ተፃርሮቶሙ ፡ ዲያብሎስ ፡ ፀርነ ፡ ለደቂቀ ፡ ኖሕ ፡ አላ ፡ አንሥኦ ፡ ለከናኦን ፡ ወልደ ፡ ካም ፡ ወኮነ ፡ መማዕልይ ፡ ዘይነፍቅ ፡ መንግሥተ ፡ እምደቂቀ ፡ ሴም ፡ እስመ ፡ ተካፈሉ ፡ ምድረ ፤ ወአምሐሎሙ ፡ በስመ ፡ አምላኩ ፡ ከመ ፡ ኢይትዐደዉ ፡ ደወለ ፡ ቢጾሙ ፡ ወከመ ፡ ኢይብልዑ ፡ ማውታ ፡ ወብትከ ፡ ወከመ ፡ ኢይዘምዉ ፡ ዘእንበለ ፡ ሕግ ፡ ከመ ፡ ኢይትመዐዖሙ ፡ ዳግመ ፡ በአይኅ ፡ ወኖሕኒ ፡ ተጋነየ ፡ ወሦዐ ፡ ወጸውዐ ፡ ወገዐረ ፡ ወበከየ ፤ ወተናገሮ ፡ እግዚኣብሔር ፤ ወይቤ ፡ ኖሕ ፡ እመሰ ፡ ዳግመ ፡ ታማስና ፡ ለምድር ፡ በአይኅ ፡ ጥስየኒ ፡ ምስሌሆሙ ፡ ለእለ ፡ ኀልቁ ፡ ወይቤሎ ፡ እግዚኣብሔር ፡ አነ ፡ እትካየድ ፡ ምስሌከ ፡ ከመ ፡ ትንግሮሙ ፡ ለደቂቅከ ፡ ከመ ፡ ኢይብልዑ ፡ ማውታ ፡ ወብትከ ፡ ወከመ ፡ ኢይዘምዉ ፡ ዘእንበለ ፡ ሕግ ፡ ወአነሂ ፡ ከመ ፡ ኢያማስና ፡ ለምድር ፡ ዳግመ ፡ በአይኅ ፡ ወከመ ፡ እሁቦሙ ፡ ለደቂቅከ ፡ ክረምተ ፡ ወሐጋየ ፡ ዘርአ ፡ ወማእረረ ፡ ጸደየ ፡ ወመጸወ ፨ ፨ ፨ ፨ |