Psalms 121
aligned by seat — same row, same verse, whatever each bible numbers it
| v | WLC2008 |
|---|---|
| 1 | שִׁ֗יר לַֽמַּ֫עֲל֥וֹת אֶשָּׂ֣א עֵ֭ינַי אֶל ־ הֶהָרִ֑ים מֵ֝אַ֗יִן יָבֹ֥א עֶזְרִֽי ׃ |
| 2 | עֶ֭זְרִי מֵעִ֣ם יְהוָ֑ה עֹ֝שֵׂ֗ה שָׁמַ֥יִם וָאָֽרֶץ ׃ |
| 3 | אַל ־ יִתֵּ֣ן לַמּ֣וֹט רַגְלֶ֑ךָ אַל ־ יָ֝נ֗וּם שֹֽׁמְרֶֽךָ ׃ |
| 4 | הִנֵּ֣ה לֹֽא ־ יָ֭נוּם וְלֹ֣א יִישָׁ֑ן שׁ֝וֹמֵ֗ר יִשְׂרָאֵֽל ׃ |
| 5 | יְהוָ֥ה שֹׁמְרֶ֑ךָ יְהוָ֥ה צִ֝לְּךָ֗ עַל ־ יַ֥ד יְמִינֶֽךָ ׃ |
| 6 | יוֹמָ֗ם הַשֶּׁ֥מֶשׁ לֹֽא ־ יַכֶּ֗כָּה וְיָרֵ֥חַ בַּלָּֽיְלָה ׃ |
| 7 | יְֽהוָ֗ה יִשְׁמָרְךָ֥ מִכָּל ־ רָ֑ע יִ֝שְׁמֹ֗ר אֶת ־ נַפְשֶֽׁךָ ׃ |
| 8 | יְֽהוָ֗ה יִשְׁמָר ־ צֵאתְךָ֥ וּבוֹאֶ֑ךָ מֵֽ֝עַתָּ֗ה וְעַד ־ עוֹלָֽם ׃ |