Psalms 39
aligned by seat — same row, same verse, whatever each bible numbers it
| v | WLC2008 |
|---|---|
| title | — |
| title | 39:1 לַמְנַצֵּ֥חַ לידיתון מִזְמ֥וֹר לְדָוִֽד ׃ |
| 1 | 39:2 אָמַ֗רְתִּי אֶֽשְׁמְרָ֣ה דְרָכַי֮ מֵחֲט֪וֹא בִלְשׁ֫וֹנִ֥י אֶשְׁמְרָ֥ה לְפִ֥י מַחְס֑וֹם בְּעֹ֖ד רָשָׁ֣ע לְנֶגְדִּֽי ׃ |
| 2 | 39:3 נֶאֱלַ֣מְתִּי ד֭וּמִיָּה הֶחֱשֵׁ֣יתִי מִטּ֑וֹב וּכְאֵבִ֥י נֶעְכָּֽר ׃ |
| 3 | 39:4 חַם ־ לִבִּ֨י ׀ בְּקִרְבִּ֗י בַּהֲגִיגִ֥י תִבְעַר ־ אֵ֑שׁ דִּ֝בַּ֗רְתִּי בִּלְשֽׁוֹנִי ׃ |
| 4 | 39:5 הוֹדִ֘יעֵ֤נִי יְהוָ֨ה ׀ קִצִּ֗י וּמִדַּ֣ת יָמַ֣י מַה ־ הִ֑יא אֵ֝דְעָ֗ה מֶה ־ חָדֵ֥ל אָֽנִי ׃ |
| 5 | 39:6 הִנֵּ֤ה טְפָח֨וֹת ׀ נָ֘תַ֤תָּה יָמַ֗י וְחֶלְדִּ֣י כְאַ֣יִן נֶגְדֶּ֑ךָ אַ֥ךְ כָּֽל ־ הֶ֥בֶל כָּל ־ אָ֝דָ֗ם נִצָּ֥ב סֶֽלָה ׃ |
| 6 | 39:7 אַךְ ־ בְּצֶ֤לֶם ׀ יִֽתְהַלֶּךְ ־ אִ֗ישׁ אַךְ ־ הֶ֥בֶל יֶהֱמָי֑וּן יִ֝צְבֹּ֗ר וְֽלֹא ־ יֵדַ֥ע מִי ־ אֹסְפָֽם ׃ |
| 7 | 39:8 וְעַתָּ֣ה מַה ־ קִּוִּ֣יתִי אֲדֹנָ֑י תּ֝וֹחַלְתִּ֗י לְךָ֣ הִֽיא ׃ |
| 8 | 39:9 מִכָּל ־ פְּשָׁעַ֥י הַצִּילֵ֑נִי חֶרְפַּ֥ת נָ֝בָ֗ל אַל ־ תְּשִׂימֵֽנִי ׃ |
| 9 | 39:10 נֶ֭אֱלַמְתִּי לֹ֣א אֶפְתַּח ־ פִּ֑י כִּ֖י אַתָּ֣ה עָשִֽׂיתָ ׃ |
| 10 | 39:11 הָסֵ֣ר מֵעָלַ֣י נִגְעֶ֑ךָ מִתִּגְרַ֥ת יָ֝דְךָ֗ אֲנִ֣י כָלִֽיתִי ׃ |
| 11 | 39:12 בְּֽתוֹכָ֘ח֤וֹת עַל ־ עָוֺ֨ן ׀ יִסַּ֬רְתָּ אִ֗ישׁ וַתֶּ֣מֶס כָּעָ֣שׁ חֲמוּד֑וֹ אַ֤ךְ הֶ֖בֶל כָּל ־ אָדָ֣ם סֶֽלָה ׃ |
| 12 | 39:13 שִֽׁמְעָ֥ה ־ תְפִלָּתִ֨י ׀ יְהוָ֡ה וְשַׁוְעָתִ֨י ׀ הַאֲזִינָה֮ אֶֽל ־ דִּמְעָתִ֗י אַֽל ־ תֶּ֫חֱרַ֥שׁ כִּ֤י גֵ֣ר אָנֹכִ֣י עִמָּ֑ךְ תּ֝וֹשָׁ֗ב כְּכָל ־ אֲבוֹתָֽי ׃ |
| 13 | 39:14 הָשַׁ֣ע מִמֶּ֣נִּי וְאַבְלִ֑יגָה בְּטֶ֖רֶם אֵלֵ֣ךְ וְאֵינֶֽנִּי ׃ |
| 14 | — |