Psalms 4
aligned by seat — same row, same verse, whatever each bible numbers it
| v | WLC2008 |
|---|---|
| title | — |
| title | 4:1 לַמְנַצֵּ֥חַ בִּנְגִינ֗וֹת מִזְמ֥וֹר לְדָוִֽד ׃ |
| 1 | 4:2 בְּקָרְאִ֡י עֲנֵ֤נִי ׀ אֱלֹ֘הֵ֤י צִדְקִ֗י בַּ֭צָּר הִרְחַ֣בְתָּ לִּ֑י חָ֝נֵּ֗נִי וּשְׁמַ֥ע תְּפִלָּתִֽי ׃ |
| 2 | 4:3 בְּנֵ֥י אִ֡ישׁ עַד ־ מֶ֬ה כְבוֹדִ֣י לִ֭כְלִמָּה תֶּאֱהָב֣וּן רִ֑יק תְּבַקְשׁ֖וּ כָזָ֣ב סֶֽלָה ׃ |
| 3 | 4:4 וּדְע֗וּ כִּֽי ־ הִפְלָ֣ה יְ֭הוָה חָסִ֣יד ל֑וֹ יְהוָ֥ה יִ֝שְׁמַ֗ע בְּקָרְאִ֥י אֵלָֽיו ׃ |
| 4 | 4:5 רִגְז֗וּ וְֽאַל ־ תֶּ֫חֱטָ֥אוּ אִמְר֣וּ בִ֭לְבַבְכֶם עַֽל ־ מִשְׁכַּבְכֶ֗ם וְדֹ֣מּוּ סֶֽלָה ׃ |
| 5 | 4:6 זִבְח֥וּ זִבְחֵי ־ צֶ֑דֶק וּ֝בִטְח֗וּ אֶל ־ יְהוָֽה ׃ |
| 6 | 4:7 רַבִּ֥ים אֹמְרִים֮ מִֽי ־ יַרְאֵ֪נ֫וּ ט֥וֹב נְֽסָה ־ עָ֭לֵינוּ א֨וֹר פָּנֶ֬יךָ יְהוָֽה ׃ |
| 7 | 4:8 נָתַ֣תָּה שִׂמְחָ֣ה בְלִבִּ֑י מֵעֵ֬ת דְּגָנָ֖ם וְתִֽירוֹשָׁ֣ם רָֽבּוּ ׃ |
| 8 | 4:9 בְּשָׁל֣וֹם יַחְדָּו֮ אֶשְׁכְּבָ֪ה וְאִ֫ישָׁ֥ן כִּֽי ־ אַתָּ֣ה יְהוָ֣ה לְבָדָ֑ד לָ֝בֶ֗טַח תּוֹשִׁיבֵֽנִי ׃ |
| 9 | — |