Psalms 56
aligned by seat — same row, same verse, whatever each bible numbers it
| v | WLC2008 |
|---|---|
| title | — |
| title | 56:1 לַמְנַצֵּ֤חַ ׀ עַל ־ י֬וֹנַת אֵ֣לֶם רְ֭חֹקִים לְדָוִ֣ד מִכְתָּ֑ם בֶּֽאֱחֹ֨ז אֹת֖וֹ פְלִשְׁתִּ֣ים בְּגַֽת ׃ |
| 1 | 56:2 חָנֵּ֣נִי אֱ֭לֹהִים כִּֽי ־ שְׁאָפַ֣נִי אֱנ֑וֹשׁ כָּל ־ הַ֝יּ֗וֹם לֹחֵ֥ם יִלְחָצֵֽנִי ׃ |
| 2 | 56:3 שָׁאֲפ֣וּ שׁ֭וֹרְרַי כָּל ־ הַיּ֑וֹם כִּֽי ־ רַבִּ֨ים לֹחֲמִ֖ים לִ֣י מָרֽוֹם ׃ |
| 3 | 56:4 י֥וֹם אִירָ֑א אֲ֝נִ֗י אֵלֶ֥יךָ אֶבְטָֽח ׃ |
| 4 | 56:5 בֵּאלֹהִים֮ אֲהַלֵּ֪ל דְּבָ֫ר֥וֹ בֵּאלֹהִ֣ים בָּ֭טַחְתִּי לֹ֣א אִירָ֑א מַה ־ יַּעֲשֶׂ֖ה בָשָׂ֣ר לִֽי ׃ |
| 5 | 56:6 כָּל ־ הַ֭יּוֹם דְּבָרַ֣י יְעַצֵּ֑בוּ עָלַ֖י כָּל ־ מַחְשְׁבֹתָ֣ם לָרָֽע ׃ |
| 6 | 56:7 יָג֤וּרוּ ׀ יצפינו הֵ֭מָּה עֲקֵבַ֣י יִשְׁמֹ֑רוּ כַּ֝אֲשֶׁ֗ר קִוּ֥וּ נַפְשִֽׁי ׃ |
| 7 | 56:8 עַל ־ אָ֥וֶן פַּלֶּט ־ לָ֑מוֹ בְּ֝אַ֗ף עַמִּ֤ים ׀ הוֹרֵ֬ד אֱלֹהִֽים ׃ |
| 8 | 56:9 נֹדִי֮ סָפַ֪רְתָּ֫ה אָ֥תָּה שִׂ֣ימָה דִמְעָתִ֣י בְנֹאדֶ֑ךָ הֲ֝לֹ֗א בְּסִפְרָתֶֽךָ ׃ |
| 9 | 56:10 אָ֥֨ז יָ֘שׁ֤וּבוּ אוֹיְבַ֣י אָ֭חוֹר בְּי֣וֹם אֶקְרָ֑א זֶה ־ יָ֝דַ֗עְתִּי כִּֽי ־ אֱלֹהִ֥ים לִֽי ׃ |
| 10 | 56:11 בֵּֽ֭אלֹהִים אֲהַלֵּ֣ל דָּבָ֑ר בַּ֝יהוָ֗ה אֲהַלֵּ֥ל דָּבָֽר ׃ |
| 11 | 56:12 בֵּֽאלֹהִ֣ים בָּ֭טַחְתִּי לֹ֣א אִירָ֑א מַה ־ יַּעֲשֶׂ֖ה אָדָ֣ם לִֽי ׃ |
| 12 | 56:13 עָלַ֣י אֱלֹהִ֣ים נְדָרֶ֑יךָ אֲשַׁלֵּ֖ם תּוֹדֹ֣ת לָֽךְ ׃ |
| 13 | 56:14 כִּ֤י הִצַּ֪לְתָּ נַפְשִׁ֡י מִמָּוֶת֮ הֲלֹ֥א רַגְלַ֗י מִ֫דֶּ֥חִי לְ֭הִֽתְהַלֵּךְ לִפְנֵ֣י אֱלֹהִ֑ים בְּ֝א֗וֹר הַֽחַיִּֽים ׃ |
| 14 | — |