Psalms 75
aligned by seat — same row, same verse, whatever each bible numbers it
| v | WLC2008 |
|---|---|
| title | — |
| title | 75:1 לַמְנַצֵּ֥חַ אַל ־ תַּשְׁחֵ֑ת מִזְמ֖וֹר לְאָסָ֣ף שִֽׁיר ׃ |
| 1 | 75:2 ה֘וֹדִ֤ינוּ לְּךָ֨ ׀ אֱֽלֹהִ֗ים ה֭וֹדִינוּ וְקָר֣וֹב שְׁמֶ֑ךָ סִ֝פְּר֗וּ נִפְלְאוֹתֶֽיךָ ׃ |
| 2 | 75:3 כִּ֭י אֶקַּ֣ח מוֹעֵ֑ד אֲ֝נִ֗י מֵישָׁרִ֥ים אֶשְׁפֹּֽט ׃ |
| 3 | 75:4 נְֽמֹגִ֗ים אֶ֥רֶץ וְכָל ־ יֹשְׁבֶ֑יהָ אָנֹכִ֨י תִכַּ֖נְתִּי עַמּוּדֶ֣יהָ סֶּֽלָה ׃ |
| 4 | 75:5 אָמַ֣רְתִּי לַֽ֭הוֹלְלִים אַל ־ תָּהֹ֑לּוּ וְ֝לָרְשָׁעִ֗ים אַל ־ תָּרִ֥ימוּ קָֽרֶן ׃ |
| 5 | 75:6 אַל ־ תָּרִ֣ימוּ לַמָּר֣וֹם קַרְנְכֶ֑ם תְּדַבְּר֖וּ בְצַוָּ֣אר עָתָֽק ׃ |
| 6 | 75:7 כִּ֤י לֹ֣א מִ֭מּוֹצָא וּמִֽמַּעֲרָ֑ב וְ֝לֹ֗א מִמִּדְבַּ֥ר הָרִֽים ׃ |
| 7 | 75:8 כִּֽי ־ אֱלֹהִ֥ים שֹׁפֵ֑ט זֶ֥ה יַ֝שְׁפִּ֗יל וְזֶ֣ה יָרִֽים ׃ |
| 8 | 75:9 כִּ֤י כ֪וֹס בְּֽיַד ־ יְהוָ֡ה וְיַ֤יִן חָמַ֨ר ׀ מָ֥לֵא מֶסֶךְ֮ וַיַּגֵּ֪ר מִ֫זֶּ֥ה אַךְ ־ שְׁ֭מָרֶיהָ יִמְצ֣וּ יִשְׁתּ֑וּ כֹּ֝֗ל רִשְׁעֵי ־ אָֽרֶץ ׃ |
| 9 | 75:10 וַ֭אֲנִי אַגִּ֣יד לְעֹלָ֑ם אֲ֝זַמְּרָ֗ה לֵאלֹהֵ֥י יַעֲקֹֽב ׃ |
| 10 | 75:11 וְכָל ־ קַרְנֵ֣י רְשָׁעִ֣ים אֲגַדֵּ֑עַ תְּ֝רוֹמַ֗מְנָה קַֽרְנ֥וֹת צַדִּֽיק ׃ |
| 11 | — |