Compare Sirach 10 — Codex Sacra

Sirach 10

aligned by seat — same row, same verse, whatever each bible numbers it

← 9 11 →

v	Geez
1	ንጉሥ፡ ጠቢብ፡ ይጌሥጽ፡ አሕዛቢሁ፡ ወመኰንን፡ ለባዊ፡ ይገብር፡ ሥርዐተ።
2	ከመ፡ መልአከ፡ አሕዛብ፡ ከማሁ፡ ወዓሊሁ፡ ወከመ፡ መኰንና፡ ለሀገር፡ ይገብሩ፡ እለ፡ ውስቴታ።
3	ንጉሥ፡ አብድ፡ የሀጕል፡ አሕዛቢሁ፡ ወሀገርኒ፡ ትጸንዕ፡ በጥበቢሆሙ፡ ለሊቃውንቲሃ።
4	ውስተ፡ እዴሁ፡ ለእግዚአብሔር፡ ኵነኔሃ፡ ለምድር።
5	ወእምገጹ፡ ለጸሓፊ፡ ይትዐወቅ፡ ጥበቢሁ።
6	ወበኵሉ፡ ዘስሕተ፡ ቢጽከ፡ ኢትኂሶ፡ ወአልቦ፡ ዘትገብር፡ ሕሡመ፡ ምንተኒ፡ በዘኄስካሁ።
7	ጽሉእ፡ ትዕቢት፡ በኀበ፡ እግዚአብሔር፡ ወበኀበ፡ ዕጓለ፡ እመሕያው፡ ወእምኵሉ፡ ተዐኪ፡ ዓመፃ።
8	መንግሥትሰ፡ ትትፋለስ፡ እምሕዝብ፡ ለሕዝብ፡ እንበይነ፡ ዓመፃ፡ ወእንበይነ፡ ጋእዝ፡ ወእንበይነ፡ ንዋይ።
9	ወለምንት፡ እንከ፡ ይትዔበይ፡ መሬት፡ ወሐመድ፡ ዘእንዘ፡ ሕያው፡ ውእቱ፡ ዘይጸይእ፡ ነፍስቱ።
9a	—
9b	—
10	ለቊስልኒ፡ ዐቢይ፡ ይፌውሶ፡ ዐቃቤ፡ ሥራይ፡ ወንጉሠሰ፡ ለዮም፡ ዳእሙ፡ ወጌሠመ፡ ይመውት።
11	ወእም፡ ከመ፡ ሞተ፡ ሰብእ፡ ይከውን፡ ክፍለ፡ ዕፄ።
12	ቀዳሚሃ፡ ለትዕቢት፡ ታውፅኦ፡ እምእግዚአብሔር፡ ወታክሕዶ፡ ልቦ፡ እምነ፡ ፈጣሪሁ።
13	ቀዳሚሃ፡ ለትዕቢት፡ ኀጢአት፡ ወለዘአጽንዐ፡ ላዕሌሃ፡ ታበዝኅ፡ ላዕሌሁ፡ ርኵሰ፡ ወእንበይነ፡ ዝንቱ፡ ያርኢ፡ እግዚአብሔር፡ ፍዳሆሙ፡ ወይገፈትዖሙ፡ ለዝሉፉ።
13a	—
14	ነሠተ፡ እግዚአብሔር፡ መናብርቲሆሙ፡ ለመላእክት፡ ወሤመ፡ የዋሃነ፡ ህየንቴሆሙ።
15	ሥርዎሙ፡ ለአሕዛብ፡ መልሐ፡ እግዚአብሔር፡ ወተከለ፡ ትሑታነ፡ ህየንቴሆሙ።
16	በሓውርተ፡ አሕዛብ፡ ደምሰሰ፡ እግዚአብሔር፡ ወሠረዎሙ፡ እስከ፡ መሠረተ፡ ምድር።
17	ወአሰሰሎሙ፡ ወአጥፍኦሙ፡ ወሰዐረ፡ እምድር፡ ዝክሮሙ።
17a	—
18	አኮ፡ ለዕጓለ፡ እመሕያው፡ ዘተፈጥረ፡ ትዕቢት፡ ወአኮ፡ ለዘይትወለድ፡ እምአንስት፡ መዓት፡ ወመንሱት።
19	ዘርዕ፡ ክቡር፡ ዘርዐ፡ ዕጓለ፡ እመሕያው፡ አይኑ፡ ዘርዕ፡ ክቡር፡ ዘርዖሙ፡ ለፈራህያነ፡ እግዚአብሔር፡ ዘርዕ፡ ኅሡር፡ ዘርዕ፡ ለዕጓለ፡ እመሕያው፡ አይኑ፡ ዘርዕ፡ ኅሡር፡ ዘርዖሙ፡ ለእለ፡ ኢየዐቅቡ፡ ትእዛዘ።
20	ክቡር፡ ውእቱ፡ መኰንን፡ እምነ፡ ቢጹ፡ ወእለኒ፡ ይፈርህዎ፡ ለእግዚአብሔር፡ ይከብሩ፡ እምኔሁ።
21	—
22	ለባዕልኒ፡ ወለክቡርኒ፡ ወለነዳይኒ፡ በፈሪሀ፡ እግዚአብሔር፡ ይከውኖሙ፡ ምክሖሙ።
23	አኮ፡ ርቱዕ፡ ያስተአክይዎ፡ ለነዳይ፡ እንበይነ፡ ንዴቱ፡ ወአኮ፡ ርቱዕ፡ ያክብርዎ፡ ለብእሲ፡ ኃጥእ፡ እንበይነ፡ ብዕሉ።
24	ይከብሩ፡ ዐበይትኒ፡ ወመላእክትኒ፡ ወመኳንንትኒ፡ ወአልቦ፡ እምውስቴቶሙ፡ ዘየዐብዮ፡ ለፈራሄ፡ እግዚአብሔር።
25	ነባሬ፡ ጠቢብ፡ ንጹሐ፡ ይትለአክ፡ ወብእሲ፡ ማእምር፡ ኢየኀይሶ።
26	ኢትጠበብ፡ እንዘ፡ ትገብር፡ ግብረከ፡ ወኢትትዐበይ፡ በመዋዕለ፡ ተጽናስከ።
27	ይኄይስ፡ ዘይትቀነይ፡ ወይትጌበር፡ እምነ፡ ዘያንሶሱ፡ ወይትሜካህ፡ ወኢይረክብ፡ ሲሳዮ።
28	ወልድየ፡ በየውሃትከ፡ አስተፍሥሐ፡ ለነፍስከ፡ ወአስተዳልዋ፡ በአምጣነ፡ ትክል።
29	ዘላዕለ፡ ነፍሱ፡ ይኤብስ፡ ለመኑ፡ ኄረ፡ ይከውን፡ ወለዘ፡ ኢያስተዳልዋ፡ ለነፍሱ፡ መኑ፡ የአኵቶ።
30	ለነዳይሰ፡ ይንእድዎ፡ በጥበቢሁ፡ ወለባዕልኒ፡ ይዌድስዎ፡ እንበይነ፡ ብዕሉ።
31	ዘአመ፡ ይጼነስ፡ ኢየሐዝን፡ አመ፡ ይዴሎ፡ እፎ፡ ይትፌሣሕ።