Compare Sirach 22 — Codex Sacra

Sirach 22

aligned by seat — same row, same verse, whatever each bible numbers it

← 21 23 →

v	Geez
1	ከመ፡ እብነ፡ ጾላዕ፡ ከማሁ፡ ሃካይ፡ በኀበ፡ ነበረ፡ ወያፀርዕ፡ ኵሎ፡ በኀሳረ፡ ሀኬቱ።
2	ከመ፡ ፅፍዕ፡ ግዱፍ፡ ከማሁ፡ ሀካይ፡ በኀበ፡ ሰከበ፡ ኵሉ፡ ዘቀተሎ፡ ነገፈ፡ እዴሁ።
3	ኀፍረት፡ ለአቡ[ሁ]፡ውሉድ፡ አብድ፡ ወወለትሰ፡ አብድ፡ ኅስርተ፡ ትከውን።
4	ወወለትሰ፡ ጠባብ፡ ትወርሶ፡ ለምታ፡ ወእንተሰ፡ ታስተኃፍር፡ ሐዘን፡ ይእቲ፡ ለወላዲሃ።
5	ወበኵለሄ፡ ተሐረምት፡ ምክዕቢተ፡ ታስተኃፍር፡ አባሃኒ፡ ወታስተኀፍር፡ ምታኒ፡ ዝልፍት።
6	ከመ፡ ዘይሰነቁ፡ በቤተ፡ ላሕ፡ ዘይነግር፡ ቃሎ፡ በኀበ፡ ረከበ፡ መቅሠፍት፡ ወተግሣጽ፡ በኵለሄ፡ ያጠብብ።
7	ከመ፡ ዘያስተጣብቅ፡ አግዕልተ፡ ዘይሜህሮ፡ ለአብድ፡ አንቅሆ፡ እምዐቢይ፡ ንዋም፡ ለዘይነውም።
8	(ከማሁ፡)ዘይነግሮ፡ ለአብድ፡ ከመ፡ ዘይነግሮ፡ ለድቁስ፡ ወሶበ፡ አኅለቀ፡ ነጊሮቶ፡ ይብለከ፡ ምንተ፡ ትቤ።
9	—
10	—
11	ብክዮ፡ ለዘሞተ፡ እስመ፡ ኀለፈ፡ ብርሃኑ፡ ወብክዮ፡ ለአብድ፡ እስመ፡ አምሠጦ፡ ልቡ። ርቱዕ፡ ትብክዮ፡ ለዘሞተ፡ እስመ፡ አልቦ፡ ምግባአ፡ ወለአብድሰ፡ ብክዮ፡ በሕይወቱ፡ እስመ፡ ሐይው፡ የአክዮ፡ እምነ፡ መዊት።
11a	—
12	—
12a	—
12b	—
13	ኢታብዝኅ፡ ተናግሮ፡ ምስለ፡ አብድ፡ ወኢትሖር፡ ምስለ፡ ዘአልቦ፡ ልብ። ወተዐቀብ፡ ከመ፡ ኢያብእከ፡ ውስተ፡ ጻሕብ፡ ወከመ፡ አትትሐየስ፡ አንተ፡ በእበደ፡ ዚአሁ። ረሐቀ፡ እምኔሁ፡ ወተዐርፍ፡ ነፍስከ፡(ወይቀልለከ)፤ ወአልቦ፡ ዘትት[ነከይ]፡አንተ፡ በእበደ፡ ዚአሁ።
14	ምንተ፡ ይከብድ፡ እምነ፡ ዐረር፡ ወምንተ፡ ስሙ፡ ዘእንበለ፡ አብድ።
15	ይኄይስ፡ ትጾር፡ ኆጻ፡ ወፄወ፡ ወዘብርታተ፡ ኀጺን፡ እምትንበር፡ ምስለ፡ አብድ።
16	መሠንየ፡ ማእሰር፡ ዘእሱር፡ ውስተ፡ ቅጽረ፡ ንድቅ፡ ወኢይትፈታሕ፡ ለእመኒ፡ አድለቅለቀ፡ ከማሁ፡ ምክረ፡ ጥበብ፡ ውስተ፡ ልበ፡ ጽኑዕ።
16a	—
16b	—
17	ወኢይትፈታሕ፡ ቅጽሩ፡ ለዝላፉ፡ ለልብ፡ ጽኑዕ፡ ወለምክረ፡ ጥበብ፡ ወከመ፡ መርገ፡ ኆጻ፡ በውስተ፡ አረፍት።
18	ወከመ፡ ሐሠር፡ ቅድመ፡ ዐውሎ፡ ዘኢይቀውም፡ እምከመ፡ መጽአ፡ ነፋስ፡ ከማሁ፡ ኅሊና፡ አብድ፡ በውስተ፡ ልበ፡ ፈራህ፡ ዘኢይቀውም፡ ለእምከመ፡ ቦቱ፡ ዘገረሞ።
19	ዘደጐጸ፡ ዐይኖ፡ ያወርድ፡ አንብዐ፡ ወዘደጐጸ፡ ልቦ፡ ያርኢ፡ ጥበበ።
20	ዘወገሮን፡ ለአዕዋፍ፡ ይሰዶን፡ ወዘይዘረክዮ፡ ለዐርኩ፡ ሰዐረ፡ ታእኃሁ።
21	እመኒ፡ መላኅከ፡ መጥባሕተ፡ ላዕለ፡ ዐርክከ።
22	ወእመኒ፡ አዕበይከ፡ አፉከ፡ ላዕሌሁ፡ ኢትቅበጾ፡ በከመ፡ ይትዓረከከ። እንበለ፡ ዳእሙ፡ ለእመ፡ ዘርከይካሁ፡ ወአዕበይከ፡ አፉከ፡ ላዕሌሁ፡ ወጸዐልካሁ፡ ወለእመኒ፡ ከሠትከ፡ ሎቱ፡ ምክሮ፡ ወተጓሕለውካሁ፡ ወአሕመምካሁ፡ በዝንቱ፡ ነገር፡ ይጐይይ፡ ኵሉ፡ ዐርክ።
23	ለእመኒ፡ ነዳይ፡ አንተ፡ ሃይማኖተከ፡ ዕቀብ፡ ምስለ፡ ቢጽከ፡ ከመ፡ ትትፈሣሕ፡ አመ፡ ትፍሥሕቱ። ለእመኒ፡ ተጸነሰ፡ ተዐገሥ፡ ምስሌሁ፡ ከመ፡ ትትፈሣሕ፡ አመ፡ ይረክብ፡ ርስቶ፡ ምስሌሁ።
23a	—
24	ለእሳትኒ፡ ይቀድም፡ ይጠይስ፡ ተነ፡ ጢሱ፡ ከማሁ፡ ለደምኒ፡ ይቀድም፡ ላኳ፡ ወጋእዝ።
25	ሰውሮቶ፡ ለዐርክየ፡ ኢየኀፍር፡ ወኢይትኀባእኒ፡ እምቅድመ፡ ገጹ።
26	ወአእመሰ፡ እኪት፡ ትረክበኒ፡ በእንቲአሁ፡ ኵሉ፡ ዘሰምዐ፡ የዐቅብ፡ ርእሶ፡ እምኔሁ።
27	መኑ፡ ይሠይም፡ ሊተ፡ ዐቃቤ፡ ላዕለ፡ አፉየ፡ ወማኅተመ፡ ጥበብ፡ ዲበ፡ ከናፍርየ፡ ከመ፡ ኢይደቅ፡ ቦቱ፡ ወከመ፡ ኢይቅትለኒ፡ ልሳንየ።