Sirach 25
aligned by seat — same row, same verse, whatever each bible numbers it
| v | Wycliffe1395 |
|---|---|
| 1 | In thre thingis it is plesid to my spirit, which ben appreued bifore God and men; acordyng of britheren, |
| 1a | 25:2 and loue of neiyboris, a man and womman wel consentynge to hem silf. |
| 1b | 25:3 My soule hatide thre spicis, and Y am greued greetli to the soule of hem; |
| 2 | 25:4 a pore man proud, and a riche man liere, and an eld man a fool and vnwitti. |
| 3 | 25:5 Hou schalt thou fynde in thin eelde tho thingis, whiche thou gaderist not in thi yongthe? |
| 4 | 25:6 Doom is ful fair in hoornesse, and to preestis to knowe councel. |
| 5 | 25:7 Wisdom is ful fair to eelde men, and gloriouse vndirstondyng, and councel. |
| 6 | 25:8 The coroun of eelde men is in myche kunnyng; and the glorie of hem is the drede of God. |
| 7 | 25:9 I magnefiede nyne thingis vnsuspect of the herte; and Y schal seie the tenthe thing bi tunge to men. |
| 7a | 25:10 A man which lyuynge is myrie in sones, and seynge the distriyng of hise enemyes. |
| 8 | 25:11 He is blessid that dwellith with a witty womman, and he that felle not bi his tunge, and he that seruyde not to men vnworthi to hym silf. |
| 9 | 25:12 He is blessid that fyndith a very frend, and he that tellith out riytfulnesse to an eere heringe. |
| 10 | 25:13 He is ful greet that fyndith wisdom and kunnyng; but he is not aboue him that dredith God. |
| 10a | 25:14 The drede of God hath set it silf aboue alle thingis. |
| 11 | 25:15 Blessid is the man to whom it is youun to have the drede of God; to whom schal he be licned, that holdith that drede? |
| 12 | 25:16 The drede of God is the bigynnyng of his loue; forsothe the bigynnyng of feith is to be faste ioyned therto. |
| 12a | 25:17 The sorewe of herte is ech wounde; and the wickidnesse of a womman is al malice. |
| 13 | 25:18 A leche shal se ech wounde, and not the wounde of herte; and al wickidnesse, |
| 13a | 25:19 and not the wickidnesse of a womman; |
| 13b | 25:20 and ech hilyng, and not hilyng of hateris; |
| 14 | 25:21 and ech veniaunce, and not the veniaunce of enemyes. |
| 15 | 25:22 Noon heed is worse than the heed of an eddre dwellynge in schadewe; |
| 16 | 25:23 and noon ire is aboue the ire of a womman. It schal plese more to dwelle with a lioun and a dragoun, than to dwelle with a wickid womman. |
| 17 | 25:24 The wickidnesse of a womman chaungith hir face; and sche blyndide her cheer as a beer doith, and sche schal schewe as a sak in the myddis of neiyboris. |
| 18 | 25:25 Hir hosebonde weilide; and his wickid wijf herde, and siyyide a litil. |
| 19 | 25:26 Al malice is schort on the malice of a womman; the parte of synneris falle on hir. |
| 20 | 25:27 As a stiynge ful of grauel in the feet of an elde man, so is a womman a greet ianglere to a pesible man. |
| 21 | 25:28 Biholde thou not the fairnesse of a womman, and coueyte thou not a womman for fairnesse. |
| 22 | 25:29 The ire and vnreuerence of a womman is grete schenschipe. |
| 22a | 25:30 If a womman hath the firste dignyte, ethir cheef gouernail, sche is contrarie to hir hosebonde. |
| 23 | 25:31 A low herte, and soreuful face, and wounde of deeth, is a wickid womman. |
| 23a | 25:32 Feble hondis and knees vnboundun, a womman that blessith not hir hosebonde. |
| 24 | 25:33 The bygynnyng of synne was maad of a womman; and alle we dien bi hir. |
| 25 | 25:34 Yyue thou not issu to thi watir, yhe, not a litil issu; nether to a wickid womman fredom of goyng forth. |
| 25a | 25:35 If sche goith not at thin hond, sche schal schende thee in the siyt of enemyes. |
| 26 | 25:36 Kitte hir a wei fro thi fleischis, lest euere sche mysvse thee. |