Compare Sirach 37 — Codex Sacra

Sirach 37

aligned by seat — same row, same verse, whatever each bible numbers it

← 36 38 →

v	Geez
1	ኵሉ፡ ዘተዓረኮ፡ ይብል፡ ተዓረኩ፡ አነኒ፡ ባሕቱ፡ ቦቱ፡ ዐርከ፡ ለስም፡ በከ፡ ዘይትዓረክ።
2	ወሐዘንሰ፡ ይነብር፡(ውስተ፡ ልብ፡)እስከ፡ አመ፡ ዕለተ፡ ሞት፡(ወቦ፡)ዐርክ፡ ዘይከውነከ፡ ጸላኤ።
3	እኪት፡ ፍትወት፡ እምአይቴኑ፡ አንኰርኰርኪ፡ ወመላእኪ፡ ውስተ፡ ብሔር፡ ኀጢአተ።
4	ወቦ፡ ዐርክ፡ ዘይቀርበከ፡ አመ፡ ትፍሥሕትከ፡ ወእምከመ፡ ተመንደብከ፡ ውእቱ፡ ይከውነከ፡ ፀረከ።
5	ወቦ፡ ዐርክ፡ ዘእንበይነ፡ ከርሡ፡ ይቴክዝ፡ ለከ፡ ሕማመከ፡ ወእምከመቦ፡ ዘዐለወከ፡ ውእቱ፡ ይቀድም፡ ይትቃተለከ።
6	ኢትርሳዕ፡ ዐርከከ፡ እምከመ፡ ተደሎከ፡ ወኢትኅድጎ፡ ለእምከመ፡ ንዋየ፡ ረከብከ።
6a	—
7	ኵሉ፡ መምክር፡ ያመክር፡ ምክረ፡ ወቦ፡ ዘያመክር፡ ዘይበቊዕ፡ ለርእሱ።
8	ዕቀብ፡ ልበከ፡ እምነ፡ ዘያመክረከ፡ ቅድም፡ አእምር፡ ትካዞ፡ በዘይፈቅደከ፡ እስመ፡ እንበይነ፡ ርእሱ፡ ያመክረከ።
8a	—
9	ወይብለከ፡ ሠናየ፡ ገበርከ፡ ወያመጽእ፡ ለከ፡ በዘ፡ ያሀጕለከ፡ ንዋየከ፡ ወእምከመ፡ ተጸነስከ፡ ይኔጽረከ፡ ወይሥሕቅ፡ ላዕሌከ።
10	ኢትትማከር፡ ምስለ፡ ዘይትዐቀበከ፡ ወኅባእ፡ ቃለከ፡ እምነ፡ ዘይትኃሠሠከ።
11	ኢትትናገር፡ ምስለ፡ ብእሲት፡ በዘታቀንኣ፡ ወኢትትማከር፡ ምስለ፡ ፈራህ፡ እንበይነ፡ ፀብእ፡ ኢትትማከር፡ እንበይነ፡ ረባሕ፡ ምስለ፡ ሠያጢ፡ ወኢትትማከር፡ ምስለ፡ ነጋዲ፡ እንበይነ፡ ተግባር፡ ወኢትትማከር፡ ምስለ፡ ደንጻዊ፡ ለውሂበ፡ ምጽዋት፤ወኢትትማከር፡ ምስለ፡ ዐላዊ፡ ለአግብኦ፡ ዕሴት፡ ወኢትትማከር፡ ምስለ፡ ሀካይ፡ በእንተ፡ ግብር፡ ወኢትትማከር፡ ምስለ፡ ዐሳብ፡ እንበይነ፡ ጥብዖት፡ ወኢትትማከር፡ ምስለ፡ አብድ፡ እንበይነ፡ ኪን፤(ቅኒ፡ ነባሬከ፡ ወኢታንብሮ፡ ፅሩዐ፤)ወምስለዝ፡ ኵሉ፡ አልቦ፡ ዘትትማከሮሙ፡ እንበይነ፡ ዝነገር።
11a	—
12	ምስለ፡ ብእሲ፡ ጻድቅ፡ ዘልፈ፡ ተናገር፡ ምክረከ፡ ዘታአምር፡ ከመቦ፡ ሃይማኖተ፡ ወይፈርህ፡ እግዚአብሔር፡ ዘከመ፡ ልብከ፡ ልቡ፡ ወእመኒ፡ ተከዝከ፡ የሐምም፡ ሕማመከ።
12a	—
13	ወአቅም፡ ምክረ፡ ነፍስከ፡ እስመ፡ ይእቲ፡ እምኵሉ፡ ምእመንከ።
14	እስመ፡ ነፍሱ፡ ለሰብእ፡ እንተ፡ ትረክቦ፡ ታሐዝቦ፡ ፈድፋደ፡ እምነ፡ ፯ቱ፡ አስባብ፡ ሰብአ፡ ዐይን።
15	ምስለ፡ ዝንቱ፡ ኵሉ፡ ጸሊ፡ ኀበ፡ ልዑል፡ ከመ፡ ያርትዓ፡ በንጹሕ፡(በጽድቅ፡)፡ ለፍኖትከ።
16	ቀዳሜ፡ ኵሉ፡ ትካዝ፡ ነገር፡ ወቀዳሜ፡ ኵሉ፡ ግብር፡ ምክር።
17	አሠረ፡ ልቡ፡ ለብእሲ፡ መርብዕተ፡ ያስተርኢ።
18	ለእመኒ፡ ለሐዘን፡ ወለእመኒ፡ ለትፍሥሕት፡ እመኒ፡ ለሞት፡ ወእመኒ፡ ለሕይወት፡ ወልሳን፡ ያመጽኦሙ፡ ለኵሎሙ።
19	ወቦ፡ ሰብእ፡ ዘበኵሉ፡ ይትሜየን፡ ወብዙኀ፡ ያአምር፡ ወኢይክል፡ በቊዖታ፡ ለነፍሱ።
20	ወቦ፡ ዘይጠብብ፡ በነገር፡ ወያጸልእ፡ ርእሶ፡ ወለዘ፡ ከመዝ፡ የኀልፎ፡ ኵሉ፡ ረባሕ።
21	እስመ፡ ኢይሁቦ፡[እግዚአብሔር፡]ሞገሰ፡ ወወጽአ፡ እምኵሉ፡ ጥበብ።
22	ሀሎ፡ ዘይጠብብ፡ ለነፍሱ፡ ወይዪውህ፡ በቃሉ።
23	ብእሲ፡ ጠቢብ፡ ይጌሥጾሙ፡ ለሕዝቡ፡ ወይሜህሮሙ፡ ጥበበ፡ ለሰብኡ።
24	ብእሲ፡ ጠቢብ፡ ይጸግብ፡ እምበረከቱ፡ ወያስተበፅዕዎ፡ ኵሎሙ፡ እለ፡ ይሬእይዎ።
25	መዋዕሊሁ፡ ለእጓለ፡ እመሕያው፡ በኈልቊ፡ ወመዋዕሊሁ፡ ለእስራኤል፡ ዘኢይትኌለቊ።
26	ዘጠበበ፡ በሕዝቡ፡ ይረክብ፡ ዕሴቶ፡ ወይነብር፡ ስሙ፡ ለዝላፉ።
27	ወልድየ፡ እንዘ፡ ሕያው፡ አንተ፡ አመክራ፡ ለነፍስከ፡ አእምር፡ ዘይብእሳ፡ ወኢተሀባ።
28	እስመ፡ አኮ፡ ኵሉ፡ ዘይደልዋ፡ ወአኮ፡ ኵሉ፡ ዘታስተአድም፡ ኵሉ፡ ነፍስ።
29	ወኢትሠሥዕ፡ ለኵሉ፡ መብልዕ፡ ወኢተሐሢ፡ ለኵሉ፡ እክል፡ ዘርኢከ።
30	እስመ፡ ያደዊ፡ ብዙኀ፡ በሊዕ፡ ወያበዝኆ፡ ለገብጥ፡ ሥሥዕት።
31	ወብዙኃን፡ እለ፡ ቀተሎሙ፡ ሥሥዕት፡ ወዘሰ፡ በዐቅሙ፡ ይበልዕ፡ ጥዑይ፡ ነፍሱ።