Sirach 9
aligned by seat — same row, same verse, whatever each bible numbers it
| v | Wycliffe1395 |
|---|---|
| 1 | Loue thou not gelousli the womman of thi bosum; lest sche schewe on thee the malice of yuel doctryn. |
| 2 | Yyue thou not to a womman the power of thi soule; lest sche entre in thi vertu, and thou be schent. |
| 3 | Biholde thou not a womman of many willis; lest perauenture thou falle in to the snaris of hir. |
| 4 | Be thou not customable with a daunseresse, nethir here thou hir; lest perauenture thou perische in the spedi werk of hir. |
| 5 | Biholde thou not a virgyn; lest perauenture thou be sclaundrid in the feirnesse of hir. |
| 6 | Yyue not thi soule to hooris in ony thing; lest thou leese thee, and thi soule, and thin eritage. |
| 7 | Nyle thou biholde aboute in the lanys of the cytee; nethir erre thou in the large streetis therof. |
| 8 | Turne awei thi face fro a womman `wel arayed; and biholde thou not aboute the fairnesse of othere. |
| 8a | 9:9 Many men han perischid for the fairnesse of a womman; and `herbi couetise brenneth `an hiy as fier. |
| 8b | 9:10 Ech womman which is an hoore, ethir customable to fornycacioun, schal be defoulid as a fen in the weie. |
| 8c | 9:11 Many men wondrynge on the fairnesse of an alien womman weren maad repreuable, for whi the speche of hir brenneth an hiy as fier. |
| 8d | 9:12 Sitte thou not in ony maner with an alien womman, nether reste thou with hir on a bed; |
| 9 | 9:13 and iangle thou not with hir in wyn, lest perauenture thin herte boowe in to hir, and thou falle in to perdicioun bi thi blood. |
| 9a | 9:14 Forsake thou not an eld frend; for a newe frend schal not be lijk hym. |
| 10 | 9:15 Newe wijn is a newe frend; it schal wexe eld, and thou schalt drinke it with swetnesse. |
| 11 | 9:16 Coueyte thou not the glorie and richessis of a synnere; for thou noost, what distriyng of hym schal come. |
| 12 | 9:17 The wrong of vniust men plese not thee, and wite thou that a wickid man schal not plese til to hellis. |
| 13 | 9:18 Be thou fer fro a man that hath power to sle, and thou schalt not haue suspicioun of the drede of deth; |
| 14 | 9:19 and if thou neiyest to hym, nyle thou do ony trespasse, lest perauenture he take awei thi lijf. |
| 14a | 9:20 Knowe thou the comynyng of deth; for thou schalt entre in to the myddis of snaris, and thou schalt go on the armuris of hem that sorewen. |
| 15 | 9:21 Bi thi vertu kepe thee fro thi neiybore; and trete thou with wise men and prudent men. |
| 16 | 9:22 Just men be gestis, ethir mete feris, to thee; and gloriyng be `to thee in the dreed of God. |
| 16a | 9:23 And the thouyt of God be to thee in wit; and al thi tellynge be in the heestis of the hiyeste. |
| 17 | 9:24 Werkis schulen be preisid in the hond of crafti men, and the prince of the puple in the wisdom of his word; forsothe in the wit of eldere men a word. |
| 18 | 9:25 A man, a ianglere, is dredeful in his citee; and a fool hardi man in his word schal be hateful. |