Song of Solomon 6

aligned by seat — same row, same verse, whatever each bible numbers it

← 5 7 →
vGeez
1 ወትቤ፡ መርዓት፡ አይቴ፡ ሖረ፡ ወልድ፡ እኁየ፡ አዋልደ፡ ኢየሩሳሌም። ወትቤ፡ አግሲጦስ፡ አይቴ፡ ኀለፈ፡ ወልድ፡ እኁኪ፡ ወንኅሥሦ፡ ምስሌኪ።
2 ወልድ፡ እኁየ፡ ወረደ፡ ውስተ፡ ገነቱ። ውስተ፡ አብያተ፡ አፈው። ይርአይ፡ ገነተ፡ ወያስተጋብእ፡ ጽጌያት።
3 ናሁ፡ አንቲኒ፡ እንተ፡ ኀቤየ፡ ከመ፡ ሥምረት።
4 አዳም፡ ከመ፡ ኢየሩሳሌም። መደንግፅት፡ ከመ፡ ሥርዐት።
5 ሚጢ፡ አዕይንተኪ፡ እምአንጻርየ። እስመ፡ እማንቱ፡ አስረራኒ፡ ውስተ፡ አየር።
6 ሥዕርትኪ፡ ከመ፡ መርዔተ፡ አጣሊ። እለ፡ አስተርአያ፡ እምአድባረ፡ ገለዓድ። ስነንኪ፡ ከመ፡ መራዕይ፡ እለ፡ ተቀርፃ። እለ፡ ዐርጋ፡ እምኅፃብ። ኵሎን፡ እለ፡ ይመነትዋ። ወአልቦ፡ እምኔሆን፡ መካን።
7 ከመ፡ ፍሕሶ፡ ቀይሕ፡ ከናፍርኪ። ንባብኪ፡ አዳም። ከመ፡ ቅርፍተ፡ ሮማን፡ መላትሕኪ፡ እንበለ፡ አርምሞትኪ።
8 ስሳ፡ እማንቱ፡ ንግሥታት፡ ወሰማኒያ፡ ዕቁባት። አዋልድ፡ እለ፡ አልቦን፡ ኍልቊ።
9 አሐቲ፡ ይእቲ፡ ርግብየ፡ ፍጽምት። ክነፊሃ፡ ክንፈ፡ ብሩር። ወገበዋቲሃኒ፡ በሐመልማለ፡ ወርቅ።
10 አሐቲ፡ ይእቲ፡ ለእማ። ወኅሪት፡ ይእቲ፡ ለእንተ፡ ወለደታ። ርእያሃ፡ አዋልድ፡ ወአስተብፅዓሃ። ንግሥታት፡ ወዕቁባት፡ ወደሳሃ።
11 መኑ፡ ይእቲ፡ ዛቲ፡ እንተ፡ እንተ፡ ትሔውጽ፡ ከመ፡ ጎሕ። ሠናይት፡ ከመ፡ ወርኀ። ወብርህት፡ ከመ፡ ፀሓይ። ወሑረታቲሃ፡ በምሥጢር። ድንጋፄ፡ ከመ፡ ሥርዐት።
12 ውስተ፡ ገነት፡ ከርካዕ፡ ወረደ፡ ወልድ፡ እኁየ፡ ውስተ፡ ዘርዐ፡ ሙሓዝ። ኀበ፡ ፈረየ፡ አከያሞስ። ይርአይ፡ ለእመ፡ ጸገየ፡ ወይን። ወለእመ፡ ፈረየ፡ ሮማን።
13 በህየ፡ እውህበከ፡ አጥባትየ፡ ለከ። ነፍስየ፡ ኢያእመረት። ረስየኒ፡ ሠረገላተ፡ ዐሚናዳብ።
14 ወይቤላ፡ ተመየጢ፡ ተመየጢ፡ ሱላማጢስ። ተመየጢ፡ ወንርአይ፡ ብኪ፡ ሰላመ።