Hover a verse for quick parallels · click it for the full panel across Bibles & notes.
1 ወእምድኅረ፡ ዝ፡ ካልአ፡ ሕልመ፡ ርኢኩ፡ ወኵሎ፡ አርእየከ፡ ወልድየ።
2 ወአንሥአ፡ ሄኖክ፡ ወይቤሎ፡ ለወልዱ፡ ማቱሳላ፡ ለከ፡ እብለከ፡ ወልድየ፡ ስማዕ፡ ነገርየ፡ ወአጽንን፡ እዝነከ፡ ለርእየ፡ ሕልመ፡ አቡከ።
3 እንበለ፡ እንሥኣ፡ ለእምከ፡ እድና፡ ርኢኩ፡ በራእየ፡ በምስካብየ፡ ወናሁ፡ ላሕም፡ ወፅአ፡ እምድር፡ ወኮነ፡ ዝኩ፡ ላሕም፡ ጸዐዳ፡ ወእምድኅሬሁ፡ ወፅአት፡ ጣዕዋ፡ አንስቲያዊት፡ አሐቲ፡ ወምስሌሃ፡ ወፅአ፡ ካልእ፡ ጣዕዋ፡ ወአሐዱ፡ እምኔሆሙ፡ ኮነ፡ ጸሊመ፡ ወአሐዱ፡ ቀይሐ።
4 ወጐድኦ፡ ዝኩ፡ ጸሊም፡ ጣዕዋ፡ ለቀይሕ፡ ወተለዎ፡ ዲበ፡ ምድር፡ ወኢክህልኩ፡ እምሶቤሃ፡ ርእዮቶ፡ ለዝኩ፡ ቀይሕ፡ ጣዕዋ።
5 ወዝኩ፡ ጸሊም፡ ጣዕዋ፡ ልህቀ፡ ወመጽአት፡ ምስሌሁ፡ እንትኩ፡ ጣዕዋ፡ አንስትያዊት፡ ወርኢኩ፡ እምኔሁ፡ ዘይወፅኡ፡ አልሕምተ፡ ብዙኃነ፡ እንዘ፡ ይመስልዎ፡ ወይተልዉ፡ ድኅሬሁ።
6 ወእንታክቲ፡ ዕጐልት፡ አንስትያዊት፡ ቀዳሚት፡ ወፅአት፡ እምቅድመ፡ ገጹ፡ ለዝኩ፡ ላሕም፡ ቀዳማዊ፡ ወኀሠሠቶ፡ ለውእቱ፡ ጣዕዋ፡ ቀይሕ፡ ወኢረከበቶ፡ ወዐውየወት፡ ኀቤሁ፡ ዐውያተ፡ ዐቢያተ፡ ወኀሠሠቶ።
7 ወርኢኩ፡ እስከ፡ ወፅአ፡ ዝኩ፡ ላሕም፡ ቀዳማዊ፡ ኀቤሃ፡ ወአርመማ፡ ወእምይእቲ፡ ጊዜ፡ ኢጸርሐት።
8 ወእምድኅረ፡ ዝንቱ፡ ወለደት፡ ካልአ፡ ላሕመ፡ ጸዐዳ፡ ወእምድኅሬሁ፡ ወለደት፡ አልሕምተ፡ ብዙኃነ፡ ወዕጐላተ፡ ጸሊማነ።
9 ወርኢኩ፡ በንዋምየ፡ ዝኩ፡ ሦር፡ ጸዐዳ፡ ዐቢየ፡ ወከመ፡ ዝ፡ ልህቀ፡ ወኮነ፡ ሦረ፡ ጸዐዳ፡ ዐቢየ፡ ወእምኔሁ፡ ወፅኡ፡ አልሕምት፡ ብዙኃን፡ ጸዐድው፡ ወይመስልዎ።
10 ወወጠኑ፡ እንዘ፡ ይወልዱ፡ አልሕምተ፡ ብዙኃነ፡ ጸዐድወ፡ ወእለ፡ ይመስልዎሙ፡ ወተለዎ፡ አሐዱ፡ ለካልኡ።