Hover a verse for quick parallels · click it for the full panel across Bibles & notes.
1 ፻፲፬ ፡ በእንተ ፡ ግብአታ ፡ ለጽዮን ። ወታቦተ ፡ ሕጉኒ ፡ ለእግዚኣብሔር ፡ ጽዮን ፡ ቅድስት ፡ ትነብር ፡ ህየ ፡ እስከ ፡ ውእተ ፡ አሚረ ፡ አመ ፡ ይነብር ፡ እግዚእነ ፡ ውስተ ፡ ደብረ ፡ ጽዮን ፤ ወትመጽእ ፡ ጽዮን ፡ ወታስተርኢ ፡ ለኵሉ ፡ ድሉተ ፡ ወሕንጽታ ፡ በከመ ፡ ቀፈላ ፡ ሙሴ ፡ በ፫ ፡ ማኅተም ፤ በከመ ፡ ይቤ ፡ በሕግ ፡ ዘብሉይ ፡ ወዘሐዲስ ፡ በስምዐ ፡ ፪ ፡ ወ፫ ፡ ይቁም ፡ ኵሉ ፡ ነገር ፡ ወአሜሃ ፡ ይቤ ፡ ኢሳይያስ ፡ ነቢይ ፡ ምዉታን ፡ ይትነሥኡ ፡ ወየሐይዉ ፡ እለ ፡ ውስተ ፡ መቃብር ፡ እስመ ፡ ጠል ፡ ዘእምኀቤከ ፡ ሕይወቶሙ ፡ ውእቱ ፤ ወሶበ ፡ ተንሥኡ ፡ ምዉታን ፡ በጠለ ፡ ምሕረቱ ፡ ዘይሰቅያ ፡ ለምድር ፡ ይቀውሙ ፡ ቅድሜሁ ፡ ምስለ ፡ ምግባራቲሆሙ ፡ ዘገብሩ ፤ ወይመጽኡ ፡ ሄኖክ ፡ ወኤልያስ ፡ እንዘ ፡ ሕያዋን ፡ ከመ ፡ ይኩኑ ፡ ለስምዕ ፡ ወሙሴ ፡ ወአሮን ፡ እምነ ፡ ምዉታን ፡ ሐይዉ ፡ ምስለ ፡ ኵሉ ፡ ወይፈትሑ ፡ መዛግሒሃ ፡ ወያርእይዎሙ ፡ ለአይሁድ ፡ ሰቃልያን ፡ ወይወቅሥዎሙ ፡ ወይዛለፍዎሙ ፡ በእንተ ፡ ኵሉ ፡ ዘዐለዉ ፡ ቃለ ፡ እግዚኣብሔር ፤ ወይሬእዩ ፡ ዘጸሐፈ ፡ ሎሙ ፡ በእዴሁ ፡ ቃላተ ፡ ለትእዛዙ ፡ ወመና ፡ ዘከመ ፡ ሴሰዮሙ ፡ ዘእንበለ ፡ ጻማ ፡ ምስለ ፡ መስፈሩ ፡ ጎሞር ፡ ወመንፈሳዊት ፡ ጽዮን ፡ ለመድኀኒቶሙ ፡ ዘወረደት ፡ ወበትረ ፡ አሮንመ ፡ እንተ ፡ ሠረጸት ፡ በአምሳለ ፡ ማርያም ፨ ፨ ፨ ፨ ፨ ፨ ፨ ፨